Vers le elezióm del quatro marzo – Di Cornelio Galas

L'è zamài 'n pàr de stimàne che a Bolignàm (dal bivio en sù, vizim a la casa dela maestra Bertamini, per capìrne) i ha més su quei tabelóni de lamiera dove se pòl tacàr la reclàm per le elezióm del quatro de marz.
L'è semper quel 'l posto. I ha fàt anca 'n prèssa perché i bùsi i è stài fati da ani e ani. Basta mèterghe dènt el pè de fèr e comodàr con qualche spesór el rest per far star driti, pù o mém a piombo, quei tabelòni.
Ma no l'è questa so màre, no l'è questo el problema.
El fàto l'è che en sti dì chì i tabeloni i è restài vòdi.
Ensoma, no gh'è stà mes su finora gnanca en toch de carta. A parte stamatina, che ho vist el manifest de «Insieme» (voleràlo dir che quel el vàl per tuti?) e qualcòs de la Lega... che però l'è vecio.
Ensoma, l'era tacà su da prima e se vede che no ì è riusidi a gratarlo zò bem come i altri.
 
Tra pensionài, se sa, oltra a vardar che nei vari cantéri i fàga polito, se parla anca de ste robe strane.
El Bepi, tant per dir, el gà na so idea su sti ritardi dei manifesti:
«I avrà finì i dindi anca i partiti... E ve dirò de pù, i avrà finì anca i dindi robài. O, come quei de Grilo, mai tornai de volta.»
Per el Giani envéze l'è tut colpa dele tipografie: le è lì che le spèta ancora l'anticipo per quel che le deve stampar su quei tochi de carta grandi.
Par difati che qualchedum abia sentì dir al bar da 'n politico de quei grossi:
«Scolta, se sbassém le tasse, se tirem via el bol de la machina e anca el canone Rai, con quai soldi paghente le tipografie?»
 
E da lì è vegnù fora la gabola: nesuni se fida pù a laorar senza aver ciapà almem na capara.
Po' gh'è i partiti che gà paura che qualchedùm 'l sbrega i manifesti o 'l ghe scriva sora monae.
E alora i speta magari i ultimi dì. E ancora gh'è quei che gà zà 'n ment de cuertàr i manifesti dei altri... Però prima i altri i deve tacarli e sicome i pensa tuti la stessa roba, tuti i spèta che qualchedum se mova per prim.
Ma forse gà resom el Berto. No gh'è pu nesuni che varda quei facioni tacai sui tabeloni: i l'ha zà visti anca massa en televisiom o sui telefonini.
Pitost i se ferma a vardar i avisi da mort, come fago tuti i di anca mi, per veder se magari ghe som su anca mi senza che nesuni me l'abia dit prima.