'Sto mondo zamài revèrs – Di Cornelio Galas

No so se voi gavé la me istessa empressiom, ma zamài da n'àm me par che tante robe le è cambiàde del tut. Dal bianch al scùr, per dir. E miga sol per colpa del virus.
Entant nel nos modo de parlar. Che dele volte pù che parlàr zavariém con quela mascherina sula boca che va 'n denter e fòra, come en stupàl ne l'aqua quando se 'l dropa per nar a pescar.
 
Avém zà parlà, temp endrìo, de tute quele parole foreste che dropém (eco perché butém fòra el dròplet, le gozoline malade) magari senza gnanca saver del tut cossa le vòl dir: loch dàun, ricovery fànd (volerà dir zercar en posto al ricovero per i nossi veci?), rt (vègnel da na targa tedesca?), smart uorching, oms e bale varie.
Tra l'alter ghe meterìa dénter anca «saturimetro» che, secondo um che conosso bem perché l'è semper famà, el sarìa n'agegio che te dìs se te t'hai magnà assà o se no te sei gnancora sazi.
 
Disénte ensoma che sem arivài a na condiziom che piam piam risciém de no ricordàrne pù come la néva (de zerto meio) na volta.
Anca perché tuti i dì – da televisiom, radio e giornai, oltre che dale telefonàe con amizi e parenti – i ne 'ntàsa récie e òci de numeri: tanti morti, tanti malài, tanti guaridi (saràl vera e soratut sarài guaridi del tut?), tanti nei ospedài.
E adès: tanti vazinài, tanti quei vazìni de mém che ariva dala Pfàizer (forsi l'è per 'sto fato, per sparmiar, che a Roveredo envéze che el vazìm stàifelo i ha dropà, per qualcheduni... l'aqua).
 
Tut mal lì bàte sèmper – come la lengua sul dènt màrz – i penséri. Anca se i sèita a dirne che prest la narà meio. Come se diséva prima de l'istà pasàda, del rest.
Dàmela tòmela, ensoma, sem ancora chi co le nòsse mascherine, le mam che mai - gnanca quando névem a l'asilo - avém lavà sì tant.
Chì, come sémi che ne saludém coi gómbeti, embacucài (a parte el frét de ste stimàne) che prest no ne conos pù gnanca la sposa.
 
E a parlàr con quei pù lontani coi telefonini dopo aver butà via zentomili ore per ensegnarghe al suocero come se fa per vardar e farse vardar entant che te parli davanti a quel agégio. E che no serve gosàr... anca se tra noi ghé pù de zinquanta chilometri.
No avréssem mai dit che saréssem nài a tor i zigareti e i giornài col fòch soto 'el cul.
Perché, quei de fòra (vist che se pol nar denter sol um ala volta) i te fa 'l gest dei pugni se sol te ghe méti n'atimim de pù a zercar i zentesimi nel portafòi.
 
Così come no avréssem mai pensà che se sarìa podùi nar da amizi e parenti al massimo en doi (tréi se con fiòl o neò con mem de quatordese ani).
Ma che però i averzéva i musei dove se pol nar denter, pochi ala volta, ma senza vardar quanti ani te gài o se te vivi ensema al... custode.
Quante contradizióm en sto mondo sèmper pu revèrs.
 
Ma ve ricordé ani fa quando gh'era problemi (anca a 'mpizàr i canoni) en montagna, a sciar, perché vegniva pòca néf?
Bem, st'am n'è vegnù zo anca massa e i skilift i è serài.
De pù: propri en sti dì chi, no me ricordo dove, i ha dovù seràr su tut anca per na gara de copa europa de sci.
Colpa del virus? No... massa néf.

Sì, el mondo l'è cambià.
Del rest anca zo a Roma le parole le è ala revèrsa.
Na volta a quei che cambiéva partito e idee pur de restar tacài ala poltrona o magari ciapàrne una de... pù comode, i ghe déva dei torobéti, dei banderòle.
Adès i li ciama costrutori, volenterosi... ma se sa che i è omeni de bona volontà.
Quel che i vol l'è n'altra roba...