Meio tanti con pochi soldi o pochi con tanti soldi? – Del Galas

Turismo de quantità o de qualità? Oscia, l'è da almém quarant'ani che 'n sento parlar.
E magari i ne parléva anca prima che tachés via a scriver sui giornai.
Sol che adès par squasi che i àbia enventà l'aqua calda quei che dis, strùca strùca, sta roba chi: «Pù de tanti no se pòl farne vegnir. Perché se scontenta tuti. E po' no l'è che i spènda pù de tant...».
 
Entant parlo de quel che conosso pù bem: la «Busa» del Basso Sarca (o de l'Alto Garda, fé voi).
Bèm. Me ricordo – ani Sesànta o zó de lì – nar en ferie al mare, per i bocéti come mi, no so i altri – voleva dir nar, se se podéva, en colonia a Cesenatico.
E per nar en montagna gh'era da zernìr tra: 1. En Colonia San Vincenz sul Mont de Vel. 2. I scaut en campegio.
Se no me papà el me deva la «busta tre»: denter gh'era oto ore zo en falegnameria a scoàr bosìe.
 
Ensoma, disénte che de stéle gh'era sol le stéle (de legn). No quele dei alberghi 'n do nar, magari co la pisìna…
L'è de alora la barzeléta (miga tant da rider): «Pòpi, se fé i bravi ancòi ve porto a Riva a vardar i sióri che magna el gelato».
Col temp l'èi nada meio. Soratut per i todeschi che – per esempi ai «Gazi», sora Bolignam – i ha scominzià a farse le casòte (e che casòte...) co la so bela pisìna denòr, el forno a l'averta e tut el rest.
 
Entant ha scominzià a vegnir anca quei che, su le prime, no i se scorzéva che i nòssi i ghe feva pagar n'aranciata come en biciér de vim de quel che costa pù de na zena.
Ensoma, diséntela tuta, quei forèsti i avém sfrutai fim che se è podù.
Fim che, a 'n zerto punto, sti chi (come anche noi taliàni) i ha vist che per esempi nela Jugoslavia (prima de la guèra) sol, mare, magnar e dormir el vegnìva na pipa de tabach.
L'unica rotura? Te cambièvi zinquantamili lire e i te deva… en milióm de dìnari. Ensoma te girevi col prosach piem de soldi. Per crompar anca en sach de patatine.
 
Ma zà da alóra – quando févem i grandi co le disgrazie de i altri – da noi era vegnù fòra la storia dei «sacopelisti».
Quei che dormiva nel sach a pel dove capitéva e se rangiéva a viver con pochi soldi en po' dapertùt.
Me ricordo che sti sacopelisti i era visti come el babao: «Cramento, i vèi chì da noi co le scatolèéte crompàe nei so posti. E anca coi so zigaréti che lori i paga de mem... Sol casini e sporcaria i ne làssa chi vizim al lach».
 
Pù envanti però è vegnù boni (putost che gnent...) anca quei.
Soratut quei che ràmpeca, che va en bici, che se buta zo col paracadute dal Bech de l'Aquila sora Pietramuràda.
E po': i bèd end brèkfast, l'albergo diffuso (mai capì come el funziona), i apartamenti per na stimana o doe. E ancora pu envanti, el covid.
Tut serà, alberghi che deve domandar l'elemosina, i ristori ai ristoranti, camerieri che sicóme i se rangia col redito de citadinanza (e qualche misteròt en nero) no i vèi pù a sfadigar per tuta la stagióm.
 
En tuta sta rumba, adès vei fòra che i turisti i è massa.
Che l'è meio pochi ma boni. Che se no i s'enmucia tuti en sta Busa. E quei che vei per trovar la paze... no i la trova pù.
Ah credo bèm. I vedo anca mì – miga sol la doménega – davanti a me cà, propri dove scominzia la stràa dela Maza, quei en cóa per tornar de volta dopo la gita sul lach.
 
Zènt che sóna, che tira zo el finestrim de la machina per far nar fora le bestemie. I me fa pecà pensando che i gh'avrà da lì, a Mori almém n'oreta e mèz (se la va bem) de rotura de... frizióm.
Zerto, gh'è anca i zinque stele (no el partito, i alberghi). Dove te se ghe vol en mutuo per pagarte sol la colazióm.
Ma miga tuti i pol permettérsei. Zerto, gh'è anca le vacanze enteligenti (pecà però che tuti sem enteligenti nela stessa maniera e partim per le ferie el stes dì.
E tornem el stes dì, ala stessa ora).
 
Zerto se podrìa (come i vol far a Venezia, come i voleva far su i passi dolomitici) farne passar sol en tot e i altri i spèta.
Ma me sa che sarìa difizile fermar na machina a Nach: «Dove ne’?» «Ah noi volém sol bever en cafè a Torbole».
Che fat? Te i mandi de volta?
 
Me sa che 'l mondo no l'è pù quel de na volta.
Per esempi: chi l'avrìa mai dit che en dì i Veneti i se sarìa encazzài coi trentini perché no i ghe deva l'aqua ma i ghe vendeva enveze el vim?