Come bòi molài dala stàla – Di Cornelio Galas

Piàm piàm i ne làssa far qualcòs 'n pù de quel che avém podù far en sti do mesi de «casa rest».
Ma no sém gnancóra for dai tovi. Anzi, tuti i dìs che per tornar ala situazióm de prima (cioè a viver come avém semper vivèst fim ai primi de marz) bisognerà stàr ancora 'n pèz su co le récie.
Se no i ne riméte tuti ai domiciliari e bonanòt ai sonadóri.
 
Zà è vist no, sui Navigli a Milam, quel che è suzés... De colp l'è come se i avés avért la porta dela stàla a bòi en calor.
Tanto che el sindaco de Milam 'l l'ha dit en televisiom: «Som encazà».
Si, l'ha dit propri «encazà» no 'nrabià o preocupà.
E lì gh'è dénter tut.
 
Zà, sarìa propri na sfiga maledeta se per colpa de qualchedum se dovés tornar presonéri en casa.
Meio alora nàr envanti piam pianèl.
Anca se per esempi su en Alto Adige i s'è méssi a corer de colp, averzendo anca quéle porte che per adès gnanca el Fugatti de Trent (ancora encazà col Boccia perché no i s'è capidi sui soldi da dar e tòr) el se fida de davèrzer.
 
El fato l'è che 'l pù dele volte anche quei (pù studiai e lezùi nel ramo) che da mesi zamài i parla en televisiom e i scrive sul fòi par che no i ne sàpia tant su sto Coronavirus (o Covid-19 o sars cov 2 o sol «virus» per far pù en pressa perché al moment no se parla de influenze e rafredor) ensóma dàmela e tòmela no s'è gnancóra capì se quei che nel sangue i gà i famosi anticorpi i pòl esser considerài guaridi del tut.
No se sa gnancóra quando e come ghe sarà sto vacino che 'l dovrìa copàr per semper sto virus, no se capìs bem gnancóra a cosa serve ste mascherine (quele chirurgiche... che adès par che se poda fàrsele anca a casa?!) se le filtra 'l 95% de l'aria che buto fòra e sol el vinti perzènto de quel che te respiri.
Che l'è come dir: som zircondà dai indiani, mì gò nela pistola zinque cartuce e lòri 80 frecie, chi elo che vinze?
 
No parlénte po' de quei che gòsa al comploto. Che tut sarìa partì da quel laboratòri cinés.
Manca sol che ghe sia de méz i marziani e i dischi volanti e 'l cine l'è bel e fàt.
Adritùra ho sentì qualchedum che 'l parléva de 'n modo per comandar en Italia come 'l duce: tuti serài dénter, guai se vedo pù de dòi en giro (i asembramenti) che magari protesta contro el governo, coprifuoco, en toch de carta che ghe sia su scrit chi te sei dove te vai e perché...
 
Se no fus che purtròpo sém davéra en ste condiziom vegnerìa da pensar che sia en schèrz de prim april (ma i ha tacà via prima per la verità) riussì così bèm da aver fat en casim en tut el mondo.
Ma no l'è purtropo en scherz. E gnanca en brut sogn.
E 'l fato che tuta l'economia (no sol la nossa, quela del mondo) la stàga per nar dal balòm su drit 'l dìs che sem propri méssi mal adès ma forsi sarém méssi mal anca per tant altro temp.
Quant? E chi èlo che lo sa? Se spetém el vaccino me sa che vèi Nadal (no digo de qual àm).
 
Po', se sa, gh'è quei che ne profìta. Che come nel mercà nero del temp de guera fa afari sule nosse disgrazie.
E sti chì me sa propri che sia bem pèzo de do boci che va a far la pasegiata sui Navigli a Milam.
Anca se, el ridigo, ste robe (far i furbi, fregarsen de le ordinanze) no se dovrìa propri farle.
 
Mah, che dirve, som propri curiós de veder come la và a finir 'sta storia. E de come sarém dopo.
Mén ciapài dale miserie? Pù malfidenti? Tacài de pù ale nosse famée? Contenti de poder dàr de nòf la mam, de abrazarne?
O gavrénte ancora la mascherina per la paura che sto virus el se sia sol scondù per vegnìrne 'ndòs de nof quando ne parerà de esser… come prima?
 
Entant preparéntene – se propri volém tornar al ristorante, no 'n pé de fora a spetàr el cartòm co la pìza – a veder per en po' de temp camerieri co la mascherina e i guanti e quei che magna con noi così lontani... da no podérghe gnanca passarghe el sal.