Te paghi per dói e te 'n ciàpi um – Di Cornelio Galas

Ani e ani fa sui scartabèi al de fòra de 'n bar de Arco i aveva scrit, tra le altre robe che i vendéva, la «cioccolatta». Sì, con con dó «t».
E qualchedum el gavéva tacà sóto, con en penarèl, «che l'è el doppi pu bonna».
Se sa, pòl capitar de sbagliàr a scriver. Me ricordo che sul giornal era finì anca altri cartèi cosìta. Tipo: «vim brullè». O «capucinno».
De solit finìva tut con la corezióm (anca del cafè, con sgnàpa, oferti dala casa) e na ridarola per qualche dì.
 
Sta storia del «doppi» però la sèita, me par. Enveze che nele parole, nei conti da pagar.
I ha tacà via - ve ricorderè no? - quando dala lira sém passai ai euri. De colp i t'ha fat pagar zinque euri quel che prima costéva zinquemili lire. Pecà che zinque euri i valés squasi el doppi, en lire.
Così come de colp ne sém desmentegài che zinquanta zentèsimi no l'era monéa, tipo le zinquanta lire ma... mìli lire oscia.
 
Per farla corta, dala matina ala sera, ne sém trovai a pagar de pù tut: dai zigaréti al cafè, dai giornai ala pizza, ensoma, da l'ucia ala corazzata, per far el cont de tut quant.
Sol che le paghe, bem o mal (pù mal che bèm) le era ancora quéle de quando se ciapéva le lire.
Pecà che tut el rest el costéssa el doppi...
Dai e dai, tutmal, sem riusìdi a nar envanti. Anca (con tanta fadìga) dopo la crisi del domilieòto.
Anca (altre tonàde) dopo el covid.
 
E arivém a sti dì chì. La benzina che... te stài atento a scorlàr la pompa fim a l'ultima gozza.
El gas che... prest no se gà pù soldi gnanca per tacarse a quela canna.
E tuti sti conti salàdi, se ghe pensé bem, prima ancora che i russi i néssa a far casini en Ucraina.
Ma no l'è finìa. Perché, drìo mam, ghe stà nando anca i costi dei ristoranti, dei bar (anca quei che vende la cioccolata co na «t» sola) e i altri mistéri de l'ombrèla.
 
Per dir: en d'n posto dove co la spósa vago a magnar da temp (tanto che i sa zà, quando me sénto zó, quel che volerìa...) me som trovà a pagar sei euri e méz per en piatìm de pomodori (zà taiàdi... forsi l'è el temp che i ghe méte a taiarli che fa alzar el cónt).
No parlente de altri piati che te convèi zamài ordinarne um sol con do forchete come se fa quando no se vol magnar da soli na cópa granda de gelato («ah l'è massa per mi sol... fénte una en dòi?»).
 
No parlente de vim, bira... che te vegnirìa la voia de dirghe: «Ma savé che con zinque euri e mèz me crompo na cassa de bire a l'Eurospin?»
E l'aqua? Do euri e mèz per mèza minerale gasada (ma de quéle che i ghe mete le bolizìne lóri a quéla del rubinet neh).
Pò el coperto: mai soto i tre euri en dòi, pù fazile de pù.
E no parlénte de griliàde de pés o de carne che... quando te le hai butàde zó te pensi... oscia no ho crompà la taiaerba nova perché me paréva massa. E adès l'è come se la gavès sul stomech.
 
La pù bela? Tògo na pizza. Ghe domando se i pòl méterme su en par de foie de basilico fresch.
Vago a pagar. Oscia, quéle do foie le ho pagade n'euro.
La prosima volta me porto drìo el vasét che gò a casa en teràza...