Tridentinali's Karma – Di Cornelio Galas

AAA zèrcasi, qualcòs che vàga pù 'n là de l'énfasi, qualcòs che no sàpia de zà vìst, de zà sentù... Tridentalini's Karma. E no gavém problemi, fin chì, a balàr co l'órs... Ghe n'è tanti zamai en Trentìm, fìm màssa dìs qualchedùm.
Tì varda quel che è suzès al Patt. Zènt butàda fòra dal partito (e l'era pàssa e quarant'ani che l'era dénter neh...), zènt che no fà pù la tessera, zènt che méte sù altri partiti.
Pàr squasi el Pd 'tagliàm. Dove, sicóme la néva massa bèm, i ha pensà de taiàrse su a tochéti. Magari sol per farghela stagnàr al Renzi.
Così come el Patt el vòl farghela paìr a quei che se dà màssa pàre e i fà ombra ai capi.
 
No l'è che i altri partiti, en Trentim, i vàga mèio. Na vòlta - nela Dc soratùt - gh'era le corènti, ensóma, i giri d'aria. Bastéva méterse però na sciarpèta per no ciapàr sù na dòia. O tacàrse, de scondóm, tra na zéna e l'altra, a quel che paréva el cavàl pù svelto.
Odìo, anca ne la Dc a 'n zèrto punto, i ha scominzià a far nòvi partiti. Credo che 'l record mondiale 'l lo gàbia el Lorenzo Dellai. Che se te me domandi de che partito l'è adès... osc'ia, gh'è da pensàrghe sù.
 
Tut dopo quei ani Novanta, quei dele Mam Nète, dei casini tirài fòra da Di Pietro e compagnia. L'è stà da alóra che è vegnù fòra i novi partiti, anca en Trentìm.
Ve ricordé le Genziane? I Cespugli? I autonomisti integrali? La Margherita, l'Upt, le Civiche del Trentino. Osc'ia no me ricordo pù i altri... ho pers el cónt.
Adès anca el Pd del Trentim el volerìa far qualcòs de mém gualìf a quei che se stà scortelàndo zò a Roma. En partito «confederato». Che sarìa come se la Ferrero la fés na Nutèla diversa, regióm per regióm.
Domanda: ma quéla fata en Trentìm gavràla 'l stés saór?
 
Tut mal - vardando sèmper i giornài vèci - gh'è sol da consolàrse. La néva pèzo quando... ne paréva che la nésse meio.
L'è da pàssa dése ani che i dìs che i sbàssa le tasse. E l'è da alòra che a 'n zèrto punto quei de Brussèls i dìs: «Piam co le màm, prima meté a posto i vòssi conti e dopo 'n parlém».
L'è da pàssa e dése ani, en Trentìm, che se dìs: «Ghe volerìa n'autonomia en màm a 'n centro-sinistra che 'l sàpia però stàr 'n pàze sia con Bolzàm che con Roma».
 
Ve digo monàe? No. Gh'è zènt, ogni tant, che su Televignole me scrive per protestar contro quel che è stà scrìt sui giornai nel 2004.
«No se pòl - i dìs - dàrghela vinta a quei che vòl fàr la moschea quando i nóssi zóveni i è senza laoro e case...».
Opùr: «Ma 'l Dellai no èrelo democristiàm? E alóra 'sa fàlo adés coi comunisti?»