Teremòt: pianzer per no rider – Di Cornelio Galas

El sò. No bisognerìa mai spuàr nel piàt dove s'è magnà fim l'alter dì. Ma se ciàva.
Anca per el fàto che ste robe chi le ho sèmper pensàe. E pù de na volta ho begà en redaziom coi me capi.
Che sia per quel che no ho fat cariera?
Tutmal no soporto pù, quando suzéde disgrazie come quéla del teremòt de pochi dì fa, le interviste, i servizi en dirèta, quei che sa tut de tut.
No se trata de far de tut na fasìna, neh… Però, osc’ia, quando l’è massa, l’è massa, dai.
 
Me ricordo quando gh’era stà el teremot nel setantaséi a Riva.
No gh’era stà morti. Però dani grossi. E famée che aveva dovù star for de casa per ’n pèz.
Mi ero zóven, alóra, ma i veci giornalisti de l’Adige i m’aveva zà fat capir el tài del prà: prima roba, mai róterghe le bale a quei che no i sà gnancora de esser al mondo dopo ’na bruta storia.
Seconda: mai far domande tant per farle.
Terza: zercàr de capir come l'è davéra messa la storia. Ensoma l'ambaradàm.
Quarta: no tirar fora le solite tiretère.
 
Bem. N'ho vist, lezù, scoltà assà de sto ultim teremòt en sti dì.
Uno che el parla del fato che i deve nar via co la televisiom perché gh'è casini, perché lì no se pòl star. E...'l pàr anca encazà, cramento. Va bem. Ma 'l parla sol de quel... entant.
N'altra che la me spiega per dése minuti quel che era suzès a l’Aquila… El savém, el savém.
N’altra ancora che l’intervista na psicologa che ghe stà drio a quei restài senza gnènt. E la psicologa la se tèi la sciarpa su la boca: no se capìss gnènt. Trane che sta zent adès la gà problemi. No l’avria mai enmaginà…
 
Po’ quei lezui e studiai. Che i dis che quéle case bisognéva farle su en maniera diversa. Ah d’acordo, ma m’hat mai dit prima dove trovar i soldi?
I sospende i mutui quei de le banche. Grazie. Gh’è da pagar qualcòs? Perché la casa tòta col mutuo no la gh’è pu e no podo gnanca ipotecarla. Anzi, adès la banca la pòl anca tegnirsela…
Parte iniziative per tor su soldi per i teremotài. Dapertùt. Tanti però i domanda: «Sónte sicur che dopo i arìva dove i dovrìa arivar?»
En televisiom i fa veder na pora dona vecia: i gà sistemà el let su en furgóm. Oh, nesuni che ghe dis al fiòl che forsi la starìa meio da n’altra banda.
 
Entant gh’è zent che scométe sui morti. Dése euri che i è de pù de quei de l’Aquila. Ma se ciàpa i soldi sol ala fim…
E quei che dis: dai che fem l’amatriciana. E do euri de ogni piat el mandém en zo.
Sì, dai magnénte tuti l’amatriciana, così ghe dem na mam…
Qualchedun ha parlà del superenaloto… «Non sté pagarlo, délo ai teremotài!». Zèrto, coi soldi dei altri i è tuti bòni a far la carità…