De che color èlo ancòi? – Di Cornelio Galas

Pòdo dìrlo? No ghe capìsso pù gnent de sti Dcpm, de ste ordinanze, de ste robe che se pòl far o no fàr a seconda dei colori che cambia. Dal dì ala nòt. Dal vèndro al sabo. Dala doménega al lùni. O anca en trà mèz ala stimàna.
Per dir, l'è come se i semafori sule stràe i seités a mudàr color. Che ala fìm no te sài gnanca tì se te pòi nar envanti o star lì fermo spetàndo che ariva el vért.
Che tra l'alter no 'l ghè, en ste légi per el còvid: gh'è sol el rosso, l'arancióm e 'l zàlt.
 
Temp endrìo - disente prima de Nadal - avevo tacà sula porta del frigo (tegnù su da quei cosi che se tàca al fèr, 'sa se ciàmei? Sì, i magneti che me porta el fiol quando el và en giro co la morosa) en retài de giornal che 'lspieghéva tut quel che se doveva (e no se podéva) far se se era en zona rossa, arancióm o zàlda.
Così la matina, tirando fòra el làt per la colazióm, ghe dévo subit n'ociàda: Ancòi l'è la vigilia de Nadàl? Bom vardénte se se pòl nar fòra e dove.
Tut bém fìm al prìm de l'àm. Pò vei fòra che 'l quatro de zenèr cambia color. Ma dal dì dopo fim al dì dela Befana se cambia de nòf. Pò dal sete...
Ho pèrs zamài el cónt. E som tornà a tacàr sul frigo i post it con su scrìt quel che manca.
 
Perché, come disévo, adès vei fòra che gh'è anca el «giàlo rinforzà».
Cioè, come se dis quando se sbianchéza la casa: el giàlo sporch. Che no l'è el giàlo giàlo, e gnanca el giàlo canarin. L'è propri el giàlo sporch. No stè domandarme perché e percome.
Fato stà che qualchedùm ha butà lì l'idea anca dela zona bianca. Che no sarìa quela giàla ma subit sóto.
Ma che però no i pòl - pàr - gnancora farla perché la néva... mèio quando la neva pèzo.
 
A parte el fàto che forsi sarìa stà meio dropàr el color vért, come per i semafori, me vèi n'alter dùbi.
E cioè: i dìs che da domàm zinque regióm 'taliàne le deventerà arancioni. E tute le altre zàlde (ma rinforzàe, che come disévo vol dir giàle sporche, magari de ròs).
Ma òcio che, se i numereti le percentuali l'rt, e 'l sònte mi cossa, i cambia en pèzo, se cambia de nof color.
Ensoma l'è n’atimo tornar endrìo pù che nar envanti.
 
Zerto che dài, gnanca voi, avrésse mai pensà, giust n'am fa de sto temp, de trovarse a vardar de che color l'è 'l posto dove abité prima de capir cossa podé o no podé far na volta mess el pè for de casa.
Ma così va el mondo zamài.
Del rest no se capìs pù gnanca come mai – vist che sém ai primi de zenér – ala Casa Bianca de Uòscintón, en Merica, i s'è trati envanti con tanta zént vestida coi costumi da carnevàl...