N’orsa e quatro gati, ala fim – Di Cornelio Galas

- Per quel che ho vist sui giornai e ala televisióm, no me paréva che ghe fùssa tanta zènt coi scartabèi contro el Rossi, quei che ha copà l’orsa e i trentini…
- Ma sì, come ha scrit qualchedum su Feisbuch… n’orsa e quatro gati ala fim.
- I me pàr na sciànta esaltài, ’s’an dìsit?
- Te dirò, quela de copàr l’orsa no me par gnànca a mì n’idea giusta. Forsi se podéva endromenzarla e portarla via come me par adès i gà entenzióm de far coi orsi en de pù o che fà casini.

- Zerto che anca la Daniza, te ricòrdit?, i voléva endromenzarla a so temp… ma i deve avérghe més massa sonifer nela cartucia.
- Va bèm, se podéva ragionarghe su meio. Però, arivar al punto de darghe dei ’sasìni a tuti i trentini, dai… gh’è modo e modo.
- Te dirò de pù. Dopo tuti quei morti a Barcelona, en Finlandia, propri en sti dì chì… dai, i podéva anca farla pu envanti sta manifestazióm se proprio i doveva farla. O farla, ma en de n’altra maniera. Dìme che senso gà nàr a zercar a Càdem quel por laór che l’ha encontrà que l’orsa e che, no so mi come l’è stàda, tut mal do bèi sgrifi ’l se l’è ciapài anca lu no? No credo che ‘l se li sia fàti per so cont per far copar l’orsa… tra l’alter l’ha dit che no l’era d’acordi sul coparla…
 
- Eco, eco. Me sà che no ghe sém dai. Credo bèm che i sia stài pochi a nar en giro con quei scartabèi… E tut mal co sto modo de far i risc’ia de pasàr da la part del tòrt. Anca se magari tanti i podéva, prima, averghe la stesa idea sula fim de quela pòra orsa.
- Difàti ho lèt… anca tanti de quei che ghe piàs i animài, che no i coperìa gnanca na mosca, dopo sta manifestazióm i è restài empapinài a sentir zerti zighi, a lézer zerti scartabèi. Oh, i n’ha dat a noi trentini dei tavàni, dei ròzi, i ha dit che dovréssem sparir dala facia dela tera. Ma se pòl?
- E alora de quei che tìra soto la zent coi furgoni cossa dovréssei dir? Che a tuti i marochini, quei de quele tere se dovrìa darghe foch? No, no ghe sem.
 
- Sì, ma t’el digo n’altra volta, anca no tegnendo cont de quel che è suzés en Spagna pochi dì endrìo, anca parlando sol de bestie che qualchedum l’ha mes nei boschi… no se pòl dir quele robe lì, dai. Te te dài la zàpa sui péi, en do minuti te mandi a remengo anca quei che da ani i fa qualcòs de serio perché no se maltràta i animài. Perché come lòri i sbàra nel mucio, anca la zènt dopo la fa l’istésa roba no? Tuti i… come se ciàmai en taliàm…? Tuti i animalisti i pàsa per scalmanài, per zent for de testa, catìvi, per quei che t’en dìs de bò e de vaca senza savér come te la pensi sui orsi per dir…
- Toh, varda, gò chi tòchi de giornai veci… Dàghe n’ociàda. L’è vera, sula storia dei orsi forsi no gh’era le idee ciàre. Qualchedùm ani fa el diséva na roba. Adès l’istés el ne dìs n’altra. Ma quei che era vegnù su a Pinzòl a far casim l’altra volta me par che i gàbia voia sol de far casìm, de tòrsela con quei che no ghe z’entra perlomém. Po’ dai, quéla de dir no sté a nar en ferie en Trentim….
- Beh, quela po’ i podéva spargnàrsela. Sém a livél de beghe tra asilòti… e alora mi ciàmo me papà che ‘l gà la bomba atomica dai… E no spartìso pù la merenda con ti ala ricreazióm.
 
- Tàsi valà, che m’ha telefonà en sti di chì anca n’amico de naja d’an zó: «Sa fé adés, copé i orsi?» E mi: «Miga sol quei, prest anca i gati e i cagni che làssa le merde en giro. I è bòni sat… anca su la griglia, sol che bisogna prima frolàrli se no, come la carne de ors, i sà massa da selvàdech».
- E lù cossa t’àlo dit?
- «Và ’n mona valà Cornelio, te buti semper tut en vàca…»
- E ti?
- Bòna anca quela, col so bèl pociatìm…
- E lù?
- El m’ha domandà se ho cambià le pirole per la depresióm.