I l’ha dìt anca ala televisióm – Di Cornelio Galas

Cari amizi de Televignole, benvegnui ala prima edizióm del nòs telegiornàl.
Se no 'l vedé bem, se vedé sul vos compiùter o su la vossa televisióm en tante righe ciàre e scure che bala... no so cossa dirve. Forsi l'è el caso de cambiar compiùter e televisióm perché noi trasmetém su la banda larga, miga su quela stréta....
Alora, scominziém da le notizie che no le pàr gnanca vére da strane che le è.

Domam - così almen dìs en comunicato dela Provincia - l'asesor ala sanità del Trentìm Luca Zeni el vegnirà zo a Arco per en corso de agiornamént.
Oltre ai mèdizi e ai infermieri de l'ospedàl è envidà tute le dòne che sta spetàndo en fiòl (o na fiòla, o gemèi, se sa) con anca i so maridi.
Ghe sarà spiegà a tuti entant come se salta su e come se vei zo da n'elicòtero.
Po', cossa far se se róte le aque e s'è magari per straa.
E ancora, come taiàr e cosìr el cordón del botóm dela comàre e tante altre robe che bisogn savér. Tut agratis neh.
Semper su i casini dela sanità gh’è n’è n’altra de bèle.
Vizim a l’ospedal de Arco i carabinieri i ha fermà quéla che paréva n’araba col burka.
«Ferma lì, ’sa fàt da ’sté bande?
Tira, buta, mola i gà fàt tirar via el pastràm nero e tut quel che scondéva la facia.
Cramento, no èrelo proprio l’assessor Zeni…!
 
N'altra notizia. Propri de si ultimi 35 ani neh. Fresca fresca diria.
El treno tra la Busa e Lopio l'è ancora blocà ala vecia staziom de Riva, per dir, dove gh'è el prim tòch de sìne.
Tut colpa dei ambientalisti stavolta. No ghe piàs el color zalt come el pis. I volerìa en vert pistachio.
E poh - anca dopo quel che ha deciso el Parlamento per la liberalizazión de l'àscis - no se se trova gnancora d'acordo: quante cane sul treno? Una, doe, quatro al massimo?
De pù, tut mal, no perché magari a qualchedum che vei la pòia.
 
Casini enveze tra Perzem e Bassam stamatina.
Sul posto pompieri, stradini, guardacaza, e anca esperti per risolvere el problema de la Val d'Elastico.
Par che l'elastico el se sia rót propri a metà tra Trentim e Veneto.
Tut colpa - i dis - del tira mola, buta, lassa.
 
A Trent la Provincia la volerìa darghe de ritorno i teréni esproprià per far su la zitadèla dei militari.
En pratica i contadini i dovrìa darghe de volta i soldi per riciapàr quel che i ha zà e temp vendù.
Uno el gà dit: «Magari volerésse anca i enterèsì neh? M baséve el cul valà, che con quei soldi ho zà mess su n’agritur diaolpòrco, no gò pù vòia de nar drio a quela campagna…»
 
Adès i róba en casa a trédese ani.
No vedo perché ste robe le deva finir sui giornài, osc’ia.
Mi ho scominzià a robarghe ciocolatini a me fradèi zà a sei ani neh.