Cosa vòlelo dir «welfar»? – Di Cornelio Galas

- Tèi, no se capìs pù gnènt en st'Itaglia...
- Difàti... se no te sài l'inglés, caro, te sei zamài taià fòra.
- Come? Spieghéme...
- Se te digo jobs act, welfare, flat tax....
- No, scusa, dìme de nòf...
- Dai che zamài se se capìs cosìta en Itaglia... L'inglés, osc'ia, se no te sai l'inglés te sei taià fòra.
 
- Scusa neh, ma no è nà su al governo quei de la Lega... Se dovrìa parlar dialèt. Bergamasch, milanés, ma no inglés...
- L'è che i ha dit che no i và for da 'l sistema dei euri, capìsset come? E alora...
- E alora mi no capìsso tut mal na madòna. 'Sa èlo sta lat tàx... forsi la tàssa sul lat?
- Ma no, stà calmo 'cramento, la tassa sul lat la gh'è zà... Sta chì la dovrìa sbassar anca le altre.
- Va bem, e 'l gòb gat? Na tàssa quando i gàti i fa la gòba?
- Fèrmete. Férmete. Zamài fà pù fazióm, anca da noi, ciamàr en inglés robe che dite sciète come le è magari te parerìa monàe, capìsset come?
 
- No, no capìsso, spiegheme meio...
- Alora: se te disés che 'l sprìd el va su ti cossa me diréssit?
- Che cambio bar, perché el sprìz dal Vasco, tant per dirte, 'l costa semper do euri...
- Eco, alora l'è meio che no te sàpi cossa che l'è dal bòm el sprìd, capìsset come?
- No ho capì gnènt ma me fido de ti che te sei lezù e studià... E 'l gòbàts? 'Sa èlo?
- Desménteghelo... L'è na roba che ha més su el Renzi. Ma adès i scancèla for tut... No stàgo chi a spiegarte el perché e 'l percome....
 
- Me fido de ti. E 'l bèmfar?
- Te volerài dir el welfare credo... Quela l'è na roba che no se sa come la narà a finir.
- Osc'ia, èla na roba 'sì difizile da spiegar?
- Te dirò. L'è da ani che i prova a ciamarghe en tute le maniere a quéla roba lì. Ma me sa che quando i ghe darà el nome giust...
- E cossa saréssel el nome giust?
- Soldi no ghe n'è pù, ciavéve...!
- Ma dai, dal bòm?
- Ah ma stà tranquilo. Prima o dopo i farà na lége en inglés che dìs listéssa roba.
- Cioé?
- I la ciamerà tut làx... O guttalax… Che 'n pratica vol dir... ma molé tut... Ne’ a cagar.