El prim giornal onlain del Trentim? Flash! – Di Cornelio Galas

Che ve dìga? L'è sodisfazióm. Su Vita Trentina, en par de stimàne endrìo, el Gianfranco Piccoli, n'amico, en colega, l'ha fat n'articol su de mi e su quel che l'è stà el prim giornal eletronico en Trentim: «Flash».
Bèm, me sóm gasà. Som deventà, come se dis, en dirigibile. Content come na pasqua.
Depù. Perché l'è quéle robe chi – me som dit – che val la pena lassàr endrìo per quando i te farà l'obit, sì ensoma, quando i te meterà zó, soto tera. El Cornelio? L'ha fat tante monàe ma anca sta roba chì, dài, por diàol.
 
Te te sènti ensóma en po' come en de na storia che dura. Come quela del me parente, quel Galas Segantìm (no Segantini, ma quel che... sega da marangóm) che l'era nà zó a Milàm drio al Caproni e che l'aveva fat le eliche dei primi aeroplani.
Oddìo, no sóm a quei livèi neh, però ghe tègno a contàr come l'è nàda en quei primi ani Novanta.
 
Alora, entànt, dala matina ala sera, ho piantà lì l'Adige. Dove gavévo en posto sicur, che me piaséva.
Robe da mati? Sì, ripensandoghe, propri da mati.
Fato sta che me trovo a diriger sto giornalét de anunci, enventà dal Benito Negri (alora el gavéva en ristorante) dal Graziano Marchi (forografo col Sergio Bresciani).
Avém més i anunci en fònt, rebaltà el modo de far quel giornalét, pagine anca per el dialèt ma robe curiose (tipo Focus) da farse lézer.
No le solite sbrodolae sul gnènt o comunicati del Comùm, dela Provincia, dele Pro Loco e batarìa varia.
 
Su le prime avevo scominzìa co l'avérghe dubi. Tanti dubi.
«Onte fat na monada dele mie?» – Me domandévo.
Po' però quando ho vist che tanti i vegniva a trovarme, a domandar de laorar con mi, me som tirà su.
E avanti, alora, diàolpòrco – me sóm dit.
 
Cosìta – grazie a zènt che alora la vardéva pù lontam del so nàs (Roberto Genta, Stefano Michelotti, Luca Cattoi che po' el deventerà el capo dela Grafìti) – sem arivai al prim Flash on àin.
Cioè a méter el giornale de carta denter el compiuter, en modo che i te podéva lezer anca... en Australia, senza nar a cromparlo al tabachìm, cramento.
Me paréva – no scherzo neh – de esser come Colombo quando l'è 'rivà en Merica la prima volta. No stévo pù nela pèl.
 
Però, come dir, se stentéva a far capir come sta storia del giornale nel compiuter la podéssa deventar... qualcos de gros.
Per esempi – me ricordo – na volta ero nà en comum a Arco a presentarghe ste idee (per far na “rete civica” comunale) al sindaco e ala giunta.
Tut preparà bem co le so bèle cartèle, le diapositive, el compiuter... quando ala fim ne sem fermai per sentir cosa che i ne diséva...
Beh, lassém perder. Me sa che quel dì al Cafè Trentino (lì de soto) ghò lassà lì pù de vintimili lire de alora tra bire e grape per stormenirme dala delusiom.
En pratica i ne aveva rispòst così: «Ah per quel l'è na bela idea... Ma quanti èi chi a Arco che gà a casa en compiuter per veder ste robe?”
 
La istessa risposta che avem ciapà en Val de Leder, a Riva, all'Apt de Campiglio (gh'era su anca el Moser alora asesor de la Provincia).
Per no parlar de le dite. Eco, sol la Cassa Rurale de Leder l n'aveva lassà provar... E mi e el Stefano erem stài su tuta la not per farghe el sito coi botoni giusti.
Po' è nà tut a petào. Massa el temp butà via e pochi i soldi che se riusìva a tirar su co ste robe. Mi som tornà co le recie basse a l'Adige.
Gò anca dat na mam a passar dai veci ai novi sistemi dei compiuter. E entànt de giornài eletrònici, de reti civiche ne arivéva ogni dì de nove...
 
«Te sei partì massa prima» – e m'ha dit uno qualche temp dopo. – «Però consolete dai, anca el Leonardo l'aveva enventà a so temp l'elicotero...»