I nòvi colóri dela bandéra 'taliàna – Di Cornelio Galas

Rós come el sól che scalda soratut el sud.. Vért come la speranza e le nòsse pianaure. Bianch come la néf e la nébia en val padana.
Se scherzéva così, a scòla, sui colori dela nòssa bandéra. Po' se sa, l'era altri i veri perché de 'sti tre colori.
Envéze le tre fàsse coloràe le vèi dala rivoluzióm franzese.
E i colori bianch e róss sarìa quei del comùm de Milàm e 'l vért sarìa stà el color enveze dei vestidi dela guardaia zivica milanésa.
Po' gh'è la storia che i ne ensegnéva sti ani a scòla. Vért come i prài taliàni, bianch come la néf (e chi ghe sém) e róss come el sangue de quei morti per far st'Italia.
 
Va bém, 'n do èlo el tài del prà, cossa vòi dir co sta entroduzióm da lezù e studià.
Sol che adés la bandéra 'taliana la è cambiada. Semper trèi i colori. Ma no i è pù gualìvi a quei de prima.
Tràne ùm: el róss. I altri dói? Aranzóm e giàlo. E 'n méz mi ghe meterìa anca en zérch con tanti rampini: no el cosìta che el coronavirus quando i lo varda al microscopi?
Sém méssi così. Da su en zìma a zó en fónt de sto nòs stivàl.
Che dove la bandéra l'è rossa no se pòl far dele robe, dove l'è color narànz se pòl far dele robe ma no altre e dove l'è zàlda parerìa che se podés esser squasi sul vért dei semafori ma no l'è propri così che la va.
 
Per capirne se mi vago da Riva a Limòm, pochi chilometri de gardesana neh, cambia tut.
Perché dal Trentìm finìsso en Lombardia.
L'istessa roba sui altri confini del Trentìm vers sta regióm. E no se sa gnancóra se col Veneto e co l'Alto Adige cambierà qualcos (en pèzo) nei prosimi dì.
Entànt – semper parlando de le regole dei tre colori dela nòva bandéra – sém chì tuti quanti che, lezèndo i giornài, vardando la televisiom, no savém gnànca pù cossa far, come mòverse, cossa pensar e cossa no pensar.
 
Ve fàgo n'esémpi. Vero neh, no enventà tant per scriver monàe.
Alora: me suocera e me suoceri, propri el dì dopo che sém nài a trovarli a Trent, vèi fòra che i gà féver, deboléza.
Ensòma no i stà bém. 37 e 8, 38 e dó, po' zó la tachipirina e zó anca la féver. Su e zó, zó e su.
«Sté calmi, oscia, pòl darse che sia colpa del frét ciapà quando sém nài al Bicigrill...»
Ma no i se calma, anzi. E na sera ala Silvana, me suocera, ghe vèi en girament de testa de not quando la va en bagno.
La casca en tèra. Pàr gnent de brut. Na bòta ala màm... El dì dopo la me casca de nòf per tèra.
E stavolta fém su casìm fim quando vèi l'ambulanza e i la porta al Santa Chiara.
 
Per farla corta, tàc, esami vari e vèi fòra che la gà el còvid.
Adès i ghe stà drìo, se dio vòl. I ghe misura lori la féver. I ghe dà da magnar e da bever...
Ma el suocero l'è a casa. Co la féver che per fortuna la và pù zó che su.
Me cugnà al ghe porta da magnar. Altri i ghe porta el so giornàl (che se no 'l và en pàra).
«Ma no se pòl nàr denter – i dìs – almém fin quando no 'l fa el tampóm.»
E tut mal no pòl nar denter zént che magari la gà el virus senza sentìrsel 'n dòss.
 
Pò la suocera par che i la manda en de na casa protèta a Calzeranica.
E che el tampóm al suocero no se pòda farlo prima de la fìm de la stimàna che vèi.
Ghe digo ala spósa: «Dai che ne fém el tampòm anca noi, cramento!».
I mèdizi de faméa (sì quei de base i ghe ciàma adès) i dìs che se no te te sènti propri mal i tamponi no se i fa.
Va bém. Ma – domando – e se mi fùssa um de quei... de quei che i ghe ciàama asintomatici? Quei ensóma che no gà gnènt che va mal, gnànca na gòzza al nàs? Gnènt da far.
 
Telefono a na clinica privada. 82 euri per el tampóm «nucleare» i dis.
E po', sotovòze: «Se vèi fòra che l'è positivo al test el vàrda che no 'l pòl pu nàr en giro neh...».
Me par de zugàr al zògh de l'òca. Che se i dadi no i déva i numeri giusti... te finìvi semper endrìo.
O ala mém pèzo... en presóm.