Santa Lùzia col còvid – Di Cornelio Galas

Entànt che se spèta ancora cosa poderém fàr ma soratùt no fàr a Nadàl, Santo Stefano, el prim de l'àm e ala Befana, ancòi per i putelòti dovrìa esserghe i sachèti coi regài de Santa Luzia.
Oh, pòl bèm dàrse che qualcòs i trova 'sti pòri bociéti.
Ma de zert no sarà 'na Santa Lùzia come quele dei ani passài.
 
A scominziàr, dirìa, dale stròzeghe che, «cuèrtafòch» a parte dale dese da sera (quando scominziéva el ciàs) me sa che no se podrà tirarle non sol co le bici ma gnanca co le màm. Zà perché – parlo de quando ero bocia, se sa – la sera prima de Santa Lùzia, l'era tut en casìm de scandorlòti, tacài ensèma co la gavéta, strozegài propri su le stràe.
Gh'era stròzeghe, per dir, longhe anca quatro-zinque metri o de pù.
En laór partì zamài ala fim de l'istà, metendo via i baràtoi dela conserva, dei spinàzi, dei fasòi, per temp.
Perché bisognéva anca netàrli, tacàrli ensèma, no na roba da far a l'ultim minùt se sa.
 
N'altra roba dela tradiziom che forsi mancherà l'è quela dell'asenèl che – i ne diséva – el paséva ensema ala Santa, sol se i putelòti i néva a dormir, disente, dopo Carosèlo.
Eco alora che se metéva sul davanzàl dela finestra dela camera en piàt con denter sàl gros o farina. Per l'asenèl, se sa.
E varda ti, la matina sal e farina no i gh'era pù e nel piàt nèt come en póm al so posto te trovévi envéze dàteri dolzi, marandini, fighi sechi e anca quale tochét de ciocolata.
 
Per i fiòi dei siori gh'era anca zugàtoi, pù o mem grandi. O adiritura le pistole de plastica co la stèla de serìfo.
E l'era 'n miràcol. Perché se stéva soto le cuèrte e i linzòi, senza fiatar, che squasi se se stofeghéva: “Guai neh – i ne disèva – se te cuchi for dal cosìm... te risci de no ciapàr gnènt.
Per la verità, dài e dài, sem però tuti arivai a véder la mama o 'l papà che i sbiseghéva entorno al davanzàl.
E 'l dì dopo nela sporcaria chisà come mai gh'era semper del sàs gros o dela farina.
 
Ma propri quando è finì sta magia oltra che restarghe màl ne sém sentìdi senza qualcos de bel, che ne féva fàr veder, nei sogni, sta Santa co 'l so asenel, volar fim sula nossa finestra.
Eco, cossa dir, st'am, me par, che no ghe sarà bisogn de star atenti a meterghe i regài sul davanzal.
Magari i te lo dirà zà sàbo sèra: «Mama, cossa me regàlit st'am per Santa Luzia?»