Lockdown? En trentin: «col cul en tèra» – Di Cornelio Galas

Me nono Carlo el me diséva sèmper: «Parla come te magni, che se no no te capisso, cramento».
E alora l'era colpa dela scòla, dove i n'ensegnéva parole «taliane» che na volta a cà, propri entant che se magnéva, nesuni dei nossi veci capiva. Perché i èra nati sóto l'Austria e i diséva ancora «staifa» per dir che na roba l'era precisa.

M'è vegnù en ment quei tempi adés che na volta sì e n'altra ancora, sui giornai e en televisiom, i dròpa parole strane. Che de zerto tanti dei nossi veci gnancora i riesse a capir cossa che le vòl dir.
Ve ne digo e spiego qualcheduna, a bràz.
 
 ASINTOMATICO 
L'è quel che no gà féver, tòs, mal de testa, mal de gola.
Ensoma l'è quel che el gà sto maledeto virus però no 'l lo sa. Perché el sta bem. Gnanca el rafredor, gnent de gnent.
E però el pòl tacarghe el coronavirus ai altri. Capisset come?
 
 CORONABOND 
L'è n'idea de Conte e Macron per tirar su soldi en Europa: per zercar de vegnirgh'en fora.
L'è che non tuti i ha capì sto tài del prà.
Ensoma: aiutete che Dio (forse) t'aiuta.
 
 COVID-19 
El numer l'è quel de l'am passà. Vol dir che entant che sbevazzem el prim de l'am sto diàolpòrco de virus el gh'era zà en giro.
Altro che bòm am...
 
 DISPNEA 
No l'è la diarea. L'è che de colp te vèi a mancar l'aria.
E alora scominzia a vegnir i dubi: gavrònte el coronavirus?
 
 DISTANZIAMENTO SOCIALE 
I dis che bisogna star lontani almén en metro um da l'altro.
Meio ancora en metro e otantadò.
Che se sa che l'è quei centimetri en pù che conta neh... I metri tut mal, a diferenza de mascherine e guanti, no i è finidi... anca perché no se pol nàr ancora al Briko.
Va bem anca i righèi che dropa i puteloti a scola.
 
 IMMUNITA' DI GREGGE 
Vol dir che sém ala fim come le pégore.
Resta vive quele che ghe la fa a viver per conto suo o quele che le è vacinade (quando e come no se sa).
Le altre? Se ciàva.
 
 ISS 
No l'è el Califato nero. Ma i pù lezui e studiai de ste malatie.
El capo l'è Silvio Brusaferro. Che adès el gà anca en soranome: Tocafer.
 
 MASCHERINE 
Sèrvele? No sèrvele? Tut mal adès le è obligatorie.
Ocio però che non tute le mascherine le è bòne, stàife, come diserìa me nono. E podé droparle per qualche ora.
Dopo le và lavade o butade via. E alora dovré nar a zercarne de nof.
 
 AUTOCERTIFICAZIONE 
En pratica l'è en toch de carta dove te devi scriver chi te sei, dove te sei nat, dove te stai nando, perché e percome. E gamari, dove te séi mort.
Ocio a no sbagliar quel che scrivè perché i ve dà la multa neh
 
 SATURIMETRO 
No l'è en termometro. Ma na moléta che messa sul dé la ve sa dir quant osigeno gh'è nel vos sangue.
Ste atenti a no bever massa perché se no magari i ve ferma per altre robe.
E tut mal l'è difizile trovar sti saturimetri en farmacia.
Pù dele mascherine e dei guanti.
 
 SMART WORKING 
L'è la posibilità de laoràr da casa. Col compiuter.
Ocio che i me dìs che en sto modo tanti i è pù controladi de prima.
E no i gà pù bisogn de l'aspirina per sudar.
 
 LOCKDOWN 
Vol dir star dove se è. Serài denter.
Col cul per tera se te gài n'atività.