Sém drìo che ném 'nvanti… O viceversa? – Di Cornelio Galas

Sì, anca se no se scólta quel che i dìs en televisióm, anca se no se lèze i giornài, zamài l'avém capì: piam piam (gnanca propri piam) stém tornando endrìo pù che nàr envanti co sta storia del covid.
S'él capìs, del rest, dal fàto che al Poli de Arco ancòi è finì le mascherine en confezióm da dése.
O da quei che sul marciapé, quando i te vede vegnir encontro, i tira anca sul nàs (perché prima i ghe l'avéva sol sula boca) la mascherina zà da zinquanta metri.
O ancora che adès, nei tabachìni, gh'è zent che se mete su el gèl sia quando i va dénter che quando i vèi fòra. Quei che làssa lì el pàm apéna tocà, senza guanti, sei so scafài. Barèa.
 
Ensoma pàr che de colp se sia tornài endrìo de pù de quele lancéte de l'orolòi che da doménega che vèi le ne farà dormir n'ora de pù.
E no l'è che ai piani alti i ne fàga star pu tranquili. Se parla de «cuertafòch» come en temp de guèra, quando per aria gireva el Pipo co le se bombe.
De feste anca coi parenti dove pù de sèi no pol esserghe: e zà bisognerà alora decider chi lassàr sul giroscale.
El cugnà o 'l zio embriagóm? La suocera che no ghe va mai bem gnènt o 'l suocero che tanto 'l s'endroménza subit dopo magnà?
 
Pò la scòla: «Basta zugàr col compiuter... empìzelo sol per far i compiti oscia».
E dopo se riscominzia a dar i numeri. Nel senso che l'era da mesi che no i agiornéva le tabèle dei malài, dei guaridi, dei morti, de quei così così.
E i numeri i dìs de solit la verità: apunto, sem envànti che ném endrìo.
Par de esser se non a febrér (sol perché no fa gnancora tant frét) almém a màrz.
Perché... i è depù quei marzi che quei sani, no per alter.
 
Vèi da domandarse come mai sem arivài a sti passi?
Dài che 'l savém tuti quanti anca se no se volém dàrne da mént. L'è perché i pù tanti st'istà i ha fat i furbi.
No sol quei che no i vol gnanca adès meter la mascherina. Ma anca quei che la tegnìva sol sul gòmbet: tant per far veder che tut mal i la gavéva drìo.
Che anca saludàrse coi gómbeti, dai, penséghe su n'atimim... A cossa sérvel se – come i ne disèva tra l'alter de far – l'è sul gòmbet che starnudém?
 
En Francia, en Inghiltera, anca en Mèrica (dove el Tràmp l'avrìa dovù aver capì cossa vol dir ciapàrse su sta dòia, ma anca adès el pàr far finta de gnènt, come fussa stà en rafredòr for de stagióm) e no sol en sti posti, zà ì stà seràndo su 'n po' tut, soratut de nòt (eco el «cuèrtafòch»).
Anca da noi par che prima o pòi (forsi pù prima) bisognerà far qualcòs de divers da quel che no s'è fat st'istà.
Per dir: tante manifestazióm le è zà saltade. Per i mercadini de Nadàl nesuni vòl giurar che i ghe sìa su i so zebedèi.
E quanto a sciàr... Tanti i se ricorda ancora quel che è suzés nei primi mesi de st'àm.
 
Dàmela e tòmela no sém né fodrài né embastìdi propri come en marz. Sol che forsi, savèndo come l'è nàda en quei momenti lì, se spera che ne meténte a ùm.
Se no sì che narém dal balóm su drìt – i dìs – e no sol perché i ospedài i sarà de nof pieni.
Anca perché deventerà en lusso podèr laoràr e tirar envanti... senza spetàr l'elemosina da qualchedum.