Sto àm maledéto – Di Cornelio Galas

Na vòlta, quando lavorévo a l'Adige, soratùt ne le feste, ma de pù el prìm de l'àm, de sòlit, vers mezdì, arivéva semper la telefonada del Giancarlo Angelini. Che 'l diséva semper la istéssa roba: «Quel che se fà 'l prìm de l'àm, pò se 'l fà per tut l'àm».
Cossa voléva dir sta specie de maledizióm? Che se te lavorévi el prim de l'àm te avréssi laorà per tut l'àm. Che se te capitéva qualcos de brut (ma anca de bel, perché no?) pò per el rest de l'àm te avréssi dovù far i conti con quela sorta de previsióm.
 
Bèm. El prìm de l'àm del domilieventùm me sà che sarém serài en casa. No ghe sarà tànt da far festa.
Gnènte veglioni, gnente mortaréti, zero via zero. Ala fìm sarà na festa per modo de dir. Sèmper che qualchedum no 'l voia no rispetar le regole, far casim, magari ciaparse en regalìm de na multa da quatrozento euri.
E alora no resta che speràr almém dal sète de zenér, quando forse i ne lasserà far qualcos de pu for de cà, quando i vazìni i scominzierà a darne qualche speranza de vegnìr fòra da sto casìm che zamài da squasi n'àm el ne tei encanedài.
 
Del rest chi èlo che l'avrìa enmaginà de trovarse, en sto fìm de àm, en de ste condizióm?
Avém fàt i fighi, quei che se ne sbàte st'istà? E alora adés dovém pagar quei pecài? O n'hai molà a so temp massa prest?
Se pò adés gh'è anca le varianti inglesi, sudafricane... Te pensi che no se gh'envegnerà fòra gnanca coi vazìni no?
E po' gh'è quei che no ghe crede gnancora, i negazionisti. Quei che dìs che l'è tut en magna magna, l'è tut na finta.
Per tegnìrne em mùa, a um, zìti e col cul scuèrt per... ciaparla propri dal de drìo.
 
Fato sta che dopo le feste de Nadàl, prima dela Befana (e no l'è dita gnanca dopo) dovém far i bravi. Star en casa.
Nar fòra co la solita autocertificazióm dove deve esserghe scrit chi sém, da dove vegnìm, dove volém nar, perché, per quant.
Sol se pensém a l'àm passà parerìa de esser su «Scherzi a part». Ma no l'è 'n scherz. L'è propri quel che suzede.
 
Per dir: ieri som partì da casa - ordini dela spósa - per nar a tor el cafè, che l'era finì. Me togo drìo l'autocertificaziom. E ala prima rotatoria - gh'era nessì do jip dei carabinieri - i me ferma.
«Oscia – penso da per mi – vot veder che l'Aygo la gà le gome lissie? Som del gat.»
Enveze no. I me domanda l'autocertificaziom. E sula carta - oh, sarò vecio bacuco ma prima de nar for de casa me l'avevo scrita neh - gh'è su scrit che vago a far la spesa a l'Eurospar de via S. Caterina a Arco. Sì perché Poli, Orvea, Coop e tuti i altri supermercati ì è serài.
«Non va bene - me dis el carabiniér - mi risulta che oggi gli alimentari siano chiusi, come bar e ristoranti.»
«Oscia - ghe rispondo - la spósa la m'ha dit che l'Eurospar l'è avert. La m'ha dit anca de torghe l'aqua e l'òio...»
Gnent da far, el carabinier el me varda malament. Me sento en delinquente. Um che vol far el furbo e far quel che no se pol. No so pù che dir, che far.
Ale tante, lì vizim, en carabinier zóven, per fortuna, el ghe dis al so capo: «No, guardi, anche mia moglie è andata oggi all'Eurospar, è proprio l'unico supermercato aperto.»

Al che i me dìs de nar via 'n préssa prima che ghe vegna voia de vardarme libret e assicuraziom.
E alora meto la prima, la seconda, la terza.
Cramento, la m'è nada bém stavolta. Ma se quel carabinier zóven no 'l fùssa stà sposà con una de chì?