Quele «Slimbiadi» tra le vigne... – Di Cornelio Galas

No, no me som sbaglià. No le era le «Olimpiadi» ma propri le «Slimbiadi» quele che da boci fèvem en campagna. O, per capirne meio, cosìta le finiva – a slimbiàe sul cul – quele gare quando ariveva el paróm del camp.
De sòlit se scominziéva co le gare de corsa. E lì no gh'era tanti problemi. Perché – a parte qualche tratór – no se trovéva gran trafico su quéle stràe tra le còl.

Per i salti ghe voléva enveze en migenìm de organizazióm en pù. Per esempi: do bachéti piantài en la tèra con en torcèl per banda che tegniva su n'altra bachéta per el lonch. E da l'altra banda en par de sachéti de scartòzi (le foie sèche dei marini, el zaldo per le bestie) per no farse mal na volta arivài de là.
Eco, chi vegnìva fòra i primi casini. Perché quando ariveva el contadìm de quel prà miga sèmper se gavéva el temp de tirar su tut l'ambaradam e scampar.
E de sicur quel che restéva lì el finìva nela fornèla del contadim zà la sera.
E òcio che con quéle listarele de legn, con quele «slìmbie» no 'l te coréssa drìo...
 
Gh'era anca el salt co l'asta. Stessi bachéti piantai per tera, ma pù alti. Stessi scartozzi (en po' de pù però, perché se salteva pu alt) al de là.
E po' l'asta. Che se néva su nei primi boschi sora Vignole a taiar, zercando anca lì de no farse veder dai guardaboschi.
Le pù bele? Quele che néva meio? Quele de nosiòl. Perché per en po' le era come l'elastico.
Le se pieghéva bem e dopo le te déva l'anda giusta per nar su alt. Anca olter i do metri neh...
Le pù sfigàde? Quele de sambùch. Perché le se sechéva en prèssa. E sul pù bel magari le se spachéva... e alora che mal ala schéna.
 
En quei ani lì el nos mito l'era el Renato Dionisi. Del Lufam.
Che – i diséva – l'aveva scominzìà a saltar co l'asta (de bambù... mai trovada dale nosse bande) propri en mèz ale vigne de so pare.
E noi boci copiévem da lù anca el modo de far prima del salt, co sta asta tra le mam, i oci che vardéva vers l'asesèla da scavalcar, po' per tera, po' de nof vers l'asesèla.
Mam su alte e po' basse. De nof vardar chi e là. E dopo via de nare...
L'era come dir Messa. Col so rito ensoma.
 
Oltra ai salti e ale corse gh'era anca... le gare a quel che butéva pu lontam i pesi, i sgiavelòti, i dischi.
Tuta roba, anca questa, fata en casa neh. Per i pesi se dropéva i «marchi» dela bilanza.
De soliti quel da en chilo. Pò la corda metrica dropàda dai muradori per misurar...
Per el disco avévem ciapà do portalampade, do mezi cuèrci per capirne. En mèz gavévem mes balòti e gerìm. Pò avenm serà su tut col nastro adesivo.
E via... Sol che prima de farghe su la mam avém spacà en par de vedri de la falegnameria de me papà.
E anca lì l'è finìa a slimbiàe.
 
Così come quando avévem zercà de tacàrghe en piombìm per far la ponta del sgiavelòt.
Na gara che no avém pù organizà: massa casìm.
Così come quela del martèl. Che l'era en martèl vero, tacà a na sogàta... Robe da no provar a casa, me racomando putèi.
 
Ala fìm de ste «Slimbiadi» gh'era la partìa de balóm.
E chi gh'era anca i risci pu grossi. Perché el dì prima névem zò en sto prà (de 'n zerto Savèl de Nach) e montévem le porte (con tant de traverse neh), metévem zò la calzina per far le righe.
 E via, con partìe che finìva sol quando néva zo el sol.
Miga semper per la verità. Perché el pù dele volte l'era za tant se prima dele slimbiàe se ghe la féva a … portar a casa el balóm.