El trentìn e i regài de Nadàl – Di Cornelio Galas

- Vàra che bisognerà anca compràr qualcòs per Nadàl e prima ancora per Santa Lùzia, che no vègna fòra come l’an passà che è vegnù a trovarte i neói e te gh’ai rifilà quei libri vèci per putelòti…
- Ma ’sa dìsit su, che i èra ancora encelofanài…?
- Sì, ma da dése ani demò dai, dai che ancòi gh’è anca la féra e qualcòs se trova a bon mercà.
- E se nèssem envèze dai cinési?
- Ma sét màt? Che magàri dopo co le baterìe se brùsa la plastica e i se fa màl? Te sai nò che roba che i te sgnàca su i cinesi…
- Ho capì, ma alóra perché i ghe la làssa vender se l’è batarìa stràza e pericolosa?
- Dài, dàme da mént a mi che ném ala fèra e qualcòs troven… senza spender tant.
 
- Oscia, e se enveze néssem zò a Affi al Tòis? Così fén anca ’na giràda sul lach dopo, ah?
- Scusa neh, ma con quel che te spendi de benzina, de autostrada, de parchegio… Me sa che ala fin te gh’en zonti, o no?
- Ma no, dai che cosita ném anca a magnàr le quagliéte e comprém qualcòs per i tòi, i mei, e anca per noi se ‘n vànza.
- Forsi no te te rendi cónt de quant che n’è restà ala rurale dopo che avèm pagà el mecanico en otóber…
- Elamadòna, se sa che le machine prima o dopo, soratut se le è vecie, le se rote…
 
- Ma la nòssa me sa che i l’ha fàta propri perché la se róta prima dele feste de Nadal… E a ogni modo ti te sei comprà anca la cinepresa nova st’istà… Oh, i và fora i soldi, i và fora… No ghe fussa mi che varda ogni dì l’estrato…
- Ma cossa dìsit che te vai da la paruchiera, da quela che te fa le ongie, da quela che te neta el nàs…
- Te sei propri n’ors, valà, e tra l’alter no te te sei gnanca scòrt che ho cambià colór dei cavéi. Anca te vardi la to sposa… Volerà dir che me farò vardàr da qualchedun altri…
- Ma ‘sa dìsit, dai, l’è che cambi colór ogni do ’stimàne, zamài ho perse l cont.
 
- Ti t’hai pèrs anca qualcos alter caro, madona santa fàme star zìta che no diga quel che me passa per el zervèl…
- Dài, dime ’sa te passa per el zervèl oltra a cambiar colór ai cavéi e compràr borse e scarpe, dai…
- Ho capì, vago mi ala fera a tor i zugàtoi per i boci…
- Va bèm, va bèm che adès me speta el Gino al bar
- Sì, ti spèta i biciéri e le botiglie a ti al bar altro che el Gino.
 
- Vèi anca ti alóra a véder ‘sa fago. Parlém de robe serie sat? E po’ te vegno mai drio mi quando te vai da la paruchiera o da quéla che te fa le ongie?
- Finìntela chì valà che zà avem butà via meza matina senza far gnent. Alora mi penso ai putelòti, tì però te dovressi pensar ai grandi
- Ma fém come tuti i ani no? El pigiama de flanèla per to pàre, en zèlten per to mama…
- Férmete, te prego, férmete…che l’è da dése ani che me pàre el ciapa el stèss pigiàma… Che me mama la me porta endrio e ti dopo te gh’el ridài… basta co ’ste figure, basta… No se fa giràr i regài, come quei panetóni che te gh’ai zò en cantina da l’am passà…. Dai che i gh’avrà la mufa zamai.
 
- Alora pénseghe ti anca ai grandi vist che te sai far mèio…
- Ah mi ghe penso anca, dopo no sta lamentarte se và for tuti i soldi dela tredicesima, neh?
- Spèta, spèta che m’è vegnù n’idea.
- Ah se t’è vegnù n’idea a tì vol dir che stanòt vei zó do metri de néf… Quei dei impianti de sci i dovrìa basàr dove te camini.
- Spèta, te digo… Gh’at en mént tute quele monàe che i ne déva quando néven en crociera? Tute quele borsòte… i gàggiet de plastica… Gh’è anca quele calcolatrici picoline… che le serve sat. Eensóma gh’avém el garàs pien… Basta tòr carta da pach e sogàta… O anca carta da giornal vecia che vei fòra pachetìni diversi dai altri e dopo ghe sarìa anca quele maietìne a mèze maneghe che i déva al mar e quel capelìm che ho vint ala gara de l’aperitivo eh… Ghe n’è de roba…!
- SBADABAAAAM (l’è el rumór dela porta sbatùa con violenza dala spósa prima di nar fòr de casa).