El dì che no sò, 'l més del mai, l'àm del mìga – Di Cornelio Galas

Diré: «'sa cóntit sù pò? El colp en testa, zo per le scale? T'àlo fàt nàr for da Ugo?»
Stravàsit adès? O a so temp t'hai magari enmanegà vért... E alora, come i sarlàti fàti con quel tipo de mànech adès te scórli?
No, no, se Dio vòl i tòchi i è ancora tuti ensèma, a parte i làvri dove i m'ha così come quando te fài en sète nele braghe, a parte bòte che vei fòr quando se cambia 'l temp.

Disénte che dopo quel che m'è suzès - e no ve la conto tùta perché gò rispèt, se no altro per tuta la zènt che ha fat de tut per tirarme fora dai gazèri - me vardo 'ntorno en maniera diversa, o mèio, zercàndo, fasèndo - pensàndo prima de tut – propri a quel dì che no so, a quel més del mai, a que l’am del mìga che te capita, te pòl capitar entant che te te sei su ‘sta tèra.
 
L’è - quel dì che no so ecètera - qualcos che no se pòl misurar.
E gnanca méter en d’en sachét. Perché no ghè orolòi che tegna, no ghè metro che ’l basta, no ghè gnanca en compiuter da ’n milióm de gìga 'n dove ghe stàga tut.
Ensóma, l'è na roba che no te sai da dove la scomìnzia e dove la finìs.
L'è come se te zerchéssi de svodàr el lach co 'n cuciarìm e 'n sèc pièm de busi, capì come?
Te te trovi a vardarte ti, entant che te sei endrìo: te te ciàmi anca. «Osc'ia, dai che nem».
E, semper ti, te te rispondi: «Ma 'n do èlo che nèm? Ghe manca tant?»
 
No ghè temp per polsarse, per fumar en zigarét. Avanti, 'cramento. Avanti se deve nar.
Anca se no se sa dove, anca se no se sa se pù 'nvanti se pòl fermarse a béver qualcos, a magnar, a dormir.
Ma e po'... perché bisogn nar envanti se dove sóm ades stago bèm?
L'è - a pensarghe bem - la istésa storia che contéva quei pu lezùi de ani e ani e ani endrìo.
Propri quando i scrivéva de la vita, de la mort, de quel che ghè 'n mèz e de quel che podrìa esserghe de là.
Se capiva che ala fim, anca lori, anca quel che zerchéva l'om serà denter 'n de na bot per dir, o quel che l'ha tòt zo el velem, arivài ale tante a zerti penseri i se ferméva. E i laséva la fim dela storia per aria.
Zà, nesùni è mai tornà de volta a contar come la finìs dal bòm...