Cornelio Galas/ 4: «No te me la conti giusta»

 No te me la conti giusta
E mi, de sòlit ’sì petenìn con tut e tuti che son nà a fidarme de ti.
No l’avès mai fàt.
Se po’ penso a quel che te me sei costada, al temp che gh’ò mès per zercar de capirte, de farte dir qualcòs soratut quando neven ensèma, via da cà, en posti che me sa no t’avevi mai vist o enmaginà.

No te eri sol na bona compagnia per mi da ani semper en giro a scorlandon e sol, rebuf, come en cagn lassà per straa.
Gh’era nela to voze, en prinzìpi almen, quando ero propri ennamorà, gh’era nela to vóze qualcòs de misteriós, che te ciapéva el cor oltre al zervèl, vist che - se sa - le man le era ocupàe a far alter.
Vòia de seràr i oci, de lassarse ninar: ma no podévo, no podévo. Se no t’avés vist, vizìm a mi, se no t’avés vardà ben ah la sarìa finìa mal, propri mal me sa.
E alóra semper tacài come se gh’avéssen la còla.
No ghe la fevo, ogni tant, a no tocarte, a far en modo che te me disési qualcos. Soratut de not, quando magari con zó en biciér, se fa pu fadiga a vegnìrghen fora anca per far quei dozento metri che manca al garàs.
Finché quel maledeto dì me m’hai lassà nele me strazze.
L’era da ’n pàr de stimane, a dirla tuta, che t’eri ’n po’ sule tue. Ogni tant pareva che te zavariéssi. Bisi per fave. Robe che no stéva né en zél né ’n tèra.
Epura no t’avevo fat gnènt de mal. Tratada come semper.
Portada con mi dapertut: anca dai amizi, dai suoceri, en vacanza, a tor la pensiom. Gnènt, te te sei messa en testa na roba e te continuévi a bater quéla solfa.
No cara putela del navigadòr satelitare, no cara mia viale Roveredo de Vignole de Arco, dove abito, no l’è viale Roveredo de Riva del Garda.
No, te te sbagli oscia, se te dico de portarme a me cà no te devi ensister che vaga a trovar el Carlo Modena al so albergo Briom.
E po’, scuseme, ma che faga, che diga, cosa capirésselo el Carlo se ghe capito lì ale doe de not?