El «bòdi scéming» – Di Cornelio Galas

Da bòcia (no gh'era gnancora i supermercati, per dir) ero... en bachét. Cioé màgher empicà.
Me ricordo ancora la me pòra nona che la matina la me féva el zabaióm:
«Màgna, magna pòpo, che i sachi vòidi no i stà en pè.»
Ma anca se magnévo na «svizerìna» (l'era i hamburger de na volta) col pòcio no gh'era vers de passar dal bachét al... ràm gròs.
 
Som restà cosita fim dopo el prim matrimoni. E fim alora gh'era quei che – col bòdi scéming, che no l'è n'invenzióm de adès – i me toléva per el cul:
«Sta atento a l'Òra del làch che se te sei ne giro d'aria giust la te porta via.»
Pò lassém stàr quel che – da pìcol – sentivo che i diséva drio la schéna ai mèi:
«Ma déghe da magnar a quel por bocia, valà.»
 
Col temp m'èro zamài abituà a sti modi de dir sul me «bòdi», cioé sul me corp.
Ensoma, no me féva pù né càlt né frét sentir dir che ghe somigliévo a Stanlio o meio che tra mì e Ollio gh'era la diferenza tra 'l dì e la nòt.
Pò, come tuti, som cresù. Soratut dopo la naja en Alto Adige ho scominzià a aprezàr robe tipo lardo, speck e... zó stivai de bira.
Per no parlar de griliàde, de formài de malga, pam nero, bianch... basta che sia pàm bòm che 'l vaga zo che 'l se copa...
 
No gà volù tant per capir che gavévo qualcos de pu gros... la panza, oscia.
E quando te meti su panza no te capita sol el mal de l'agnèl (con quel che se slarga e quel che se scorta), te vèi endòs de colp tante altre rogne.
La prima: piam piam no e va pù bem i vestidi. Soratut quei pu bei.
El vestì da spós po'... da desmentegar ne l'armàr. Per semper.
Per en po' de temp te pòi anca nar envanti co le felpe xxxxxxl. Ma no l'è quela so mare... Prima o dopo te devi anca méterte na giaca e la cravata. E... prova ti a farte el gròp de la cravata quando te gài en col da elefante.
 
Eco alóra che anca quei che parla del to «bodi» i cambia modo de torte per el cul:
«Oscia, Cornelio 'sa fàt en giro co la to custodia endós?»
E ancora: «Scusa se t'el digo, neh, ma quando te guidi la machina me par che tut el pìca vers manca, cioé vers el sentàl de ti che te guidi: at controlà le sospensiom o i semiassi?»
Per no parlar de quando se néva fora a magnar: «Pe noi n'antipastìm. Per el Cornelio ne pòrtel el menù comitive?»
 
No, no i era semper così cativi, per la verità. Anca per el fato che stévo al zòch.
E così, dopo na magnada che no finìva pù, con tuti zamài arivài anca al màzzacafè, vegnìvo fora co la me batùda: «Ebbenvallah, nénte ale tante a farne na bèla pìza?»
 
Ani e ani dopo ho encontrà uno de quei amizi che me toléva en giro.
L'era su na bici da corsa. Tut tirà. Gnànca en fìl de gràs.
El so bèl caschét de plastica en testa.
Gò dit: «Bèl el to bòdy. Piém de reclàm. Ma quei che fa publicità su la to maiéta te dài po' i soldi per... magnar? Dirìa de no...».