I ghe ciàma... Suoni dele Dolomiti – Di Cornelio Galas

L'amianto? Sì, 'na gróssa rogna. Pecà che prima che i se 'scorzés che l'era tòssech mi som stà ani a zugar, da bocia, soto quei bacuchèi, soto quei capàni, perfìm soto 'l solèr.
I vazìni? Meno male che a scòla i ne metéva 'n fila per dòi. E zó a pè da Bolignàm ala Poliambulanza (denór ai pompieri) de Foro Boario a Arco.

Le «varòle» le gò ancora su 'n bràz. Gh'è sènt dela me età che l'è su na carzozèla... per dir.
Co la poliomelite. Fum pasìf? Me nono 'l fumevéva alfa senza filtro. Dala matina ala séra. E difàti adés do pachéti al dì de emmesse no i me basta.
Som vegnù sù cola ... droga dura. E podrìa nar envanti fim doma matina con tute le robe che m'ha fat vegnir su come n'alber stòrt...
Ma adès, che som zamài vecio, pensionà, che àrfio sol a nar a tòrme 'l giornal e i zigaréti su dai Morandi a Bolignam, tut engióto, trane na ròba: 'l ciàs. Diré: osc'ia, te sei màrz, enquinà, da meter zó dopo 'l rosàri, no stà róter i maroni.
E 'nvéze i roto. Perché me par che anca quei che vòl defender i panda, i orsi, le bestie dropàe malament nei circhi, per dir, no i se rende cont de quel che 'l ciàs pol far de dani.
 
No ghe credé? Ve conto alora quel che me sta suzedendo da ani zamai. La matina, for dal lèt, tirando i péi vers 'l bagno - e sém vers le òto neh - gh'è semper qualchedum, en tute le stagióm, che gà misteròti da far a l'averta.
E drìm e dràm, e bum e bam. Va bèm, me digo, te sei pensionà.
Lassa che quei che deve arivar ala pensióm i te paga la pensióm. Però - me digo subit dopo - mi la pensióm me la sóm pagàda da per mi.
 I m'ha tirà via tanti soldi neh dale buste paga per quél. E alóra? E alóra, diaolporco, se te vài envanti ancora con quela motosega... vegno zó e te la meto nel... Ma no se pòl, no se pòl far semper quel che se pensa.
 
Vago 'n teràza. Ah, che bòm sto cafè dela machinéta. Squasi meio de quel de la mòca. Che pò co la mòca l'era 'n casìm dai, nèta, sporca, sporca nèta.
El cuciarìm del cafè, spetàr che la bòia... En quéla passa via na moto, vers la Maza, che la pàr 'n missile.
Eco... adès l'è ala chìpa...e te la senti ancora. Adès la sarà a passo San Zoàm...e te la senti ancora. Ma gh'è na lègie per le marmite dele moto?
No l'è finìa chì. Tàca via le campane dela ciésa de Vignole. E dim e dàm e dòm. E dìm e dàm e dòm. Va bèm, ho capì, l'è 'l màgio, l'è la funzióm, l'è 'n funeràl, l'è le nove de sera. Ho capì, 'cramento.
Ma ale tante preferirìa i gosaménti dei arabi su quei campanili alti ... almém i lo fà poche volte al dì. E  dìm, e dòm, e dàm.
Ho capììì... Tanto no vegno a Messa, som divorzià, no podo far la comuniom...
 
Me calmo, zerco de calmarme. E de sóto tàca via i bòci. Oh, sóm stà anca mi bocia. Oh, som pàre e nono anca mi.
Ma quando 'n bocia el sèita a dir: «Papà andiamo al parco? Papà andiamo al parco? Papà andiamo al parco? Papà andiamo al parco?»
Me vegnirìa voia de risponderghe dala me teràza: «Varda, se to papà no vòl portarte al parco te porto mi, subit. Dopo però, te stupi la boca almem fim a domam matina, ghe stàt?»
 
Disé che basta cosìta? No, no l'è finìa. Ale tante me sèro 'n casa. Empìzo la televisióm. Osc'ia 'n casìm. Zent che parla entant che parla i altri.
No se capìs na madòna. Cambio canal... L'istéss. Arivo perfìm en quele televisiom che fa sol reclàm. Anca lì che i gòsa per venderte monàe.
Empìzo la radio. Ah che bèla canzóm. E subit quel che gà la cufia e che 'l mete su i dischi che 'l ghe parla sóra. E 'l gòsa per sbarar le so cazàe.
Fim quando na séra n'amico 'l me fa: «Dài che domàm te porto via da sto casìm. Nèm nela pàze dei monti...»
 
Cramento, subit. Partirìa anca stanòt.
La matina dopo, prosàch en spàla, su vers 'l Brenta.
Pàssi da montagnèri. Um dopo l'alter.
Che bèl. Nesùni che parla. Anca perché se te parli entànt che te vai 'n montagna no te sparàgni 'l fià.
Che bèl, che bèl... Ah che bèl. Arivài dopo la còsta... 'n sàch de zent.
I è de zèrt vegnùi su co la funivia sti diaolporchi... Bòci che gòsa... E po' tàca via el concerto rock. A manéta...
I suoni dele Dolomiti i ghe ciàma…