L'ultim diaolpòrco de l'am – Di Cornelio Galas

Dai che manca zamai sei minuti... Tira for la bòza... Come, no t'hai tot la bòza al Poli...?
E. 'sa fente adès...? O’scia manca la bòza... Ma… e quéla che avévem tòt per Nadal?
Ah, finìa...
Oscia capodàm senza en cin cin... porta mal... Speta, speta...
Con còsa hat fat i ósei scampài ancòi?
Sì, va bem, ho capì coi ósei scampai. Ma sóra gat més en góz de vim bianc?
Eco... Ma sì l'è lo stess se el sà de gnào perché no te gai més el stupàl...
Dai dai tìrelo fora... En tòch de scottex che el serém su....
Mòvelo en po'... Buteghe denter quel per digerir... L'alka selzer... che el fa le bolicine... eco.
Quant manca? Dimel pòch prima che tiro via el stupàl de carta...
E i bicieri? I bicieri... fa gnent. Le chichere de cafè... e le è sporche? L'è lo stess... Fem en resentim.... BUM! BOM AM.
 
 EL CONT ALA REVERSA 
Men dés, men nòve,
men òto, me sète,
men séi, men zinque
men quàter, men trée
men dó.... men um…
 
 BOM AM, BOM AM 
E via a basarse
soto el viscio
(ocio a no restarghe tacai)
a sofiar nele lengue
che se slonga
e sona come i zugàtoi
per i boci e i cagni.
 
Po' i mesagini
le telefonade.
«Sì, anca chi
sem nel nof am
Ma dai, anca lì?»
E via col trenim
(popo, zo le mam
dal cul neh...)
 
E zò col bever
e zò el codeghìm
(métete el paltò
se no te vèin
'na congestióm)
Vara vara i foghi
per aria.
 
Ma varda che
te se brusa
el mantim davera
nel portacenere...
E dai che no sarà
miga l'ora da
nar a dormir adès.
 
L'è el prim de l'am.
Tò na feta de panetóm
che la suga...
 
Ensoma se se trova
dopo vers mezdì
se propri la va bem
Bevit qualcòs?
Vara, pitòst
me trago nel lach.
 
Magnit qualcos?
Vara, pitòst
me sèro i lavri
col fil de fer
come quei pori laori
dei barconi
Fénte almén do passi?
 
Vara, squasi
torno nel lèt
No so, me par
de butar su
quel che ho apena
butà zo.
 
Vei sera, oci picoi
boca empastada.
Domam a disnar
dai suoceri?
Dighe che i n'ha
robà la machina.
Men 365, men 364,
men 363...ala
prosima fim de l'am
 
 NINA NANA AL DOMILIESEDESE 
Dormi, dormi piam piam
Am che passa
Te tegno na mam
Dormi, sera i ocièti
 
No ‘sta scoltàr
I mortarèti
Speta che te meto
Sora na cuertèla
Se no te basta
Empizo la fornèla.
 
Dai che zamài
Te te ’ndromenzi.
Nela tera ghè zà
I to somènzi.
Te n’hai fat de cote e crude
Come to papà e to nòni
Sé stai tuti ala fim
Sia cativi che boni
Dormi, te sei vecio
Ghè quel nof demò
Vizim ala porta
Va nel let valà.
 
Te porto mi la spòrta
Dai, no stà tortela
L’è el destim de tuti.
Prima o dopo da l’alber
Casca anca i fruti
Ma te verài, crédeme a mi
Che qualchedùm
Per qualcòs de bèl
Se ricorderà anca de ti.