Cornelio Galas, saóri/ 9 – El salam de ciocolata

> 
Gh'avé scatole de biscoti ancora mèze avèrte da prima de Nadàl? Gh'è tochéti de biscòti vanzài che nesùni vol tòr su a colazión? Alóra è 'rivà el moment de far el salàm de ciocolata.
No gh'avè vanzaròti de sto tipo? Ne’ a comprarli i biscoti : va bèn quei séchi, no - per capirne - i Ringo, o quei mòì, co la crema ...
Per quatro che magna (tuti nela stessa maniera, no quatro slapazuchi) se ghe vòl: do róssi de òf (buté via la ciàra), quatro cuciàri de zùcher, n'èto de buro, tre cuciàri de cacao amàr. en bicierìn de sgnàpa (o de rùm), do eti de quei biscoti séchi che ve disévo.
Bòn. Zó nel piàt alt e larch i do róssi de of. Zó anca el zucher (doi dei quatro cuciàri). E, come semper, via co le manòte, menàr el méstol (meio el pirón), che vegna fòra na bela crema.

En banda entant avré zà colà (no farlo fritegàr, no dové miga còser gnente neh...) el buro e spacà sù a tochetini (pìcoi, no tòchi grandi) i biscoti. Eco, alora dénter néla crema el buro colà, i altri do cuciàri de buro, el cacao, la sgnapa (o el rum).
Po', quando tut s'è mscià bem, dénter anca i biscoti. E n'altra bela svoltolada. Che ghe sia ensoma màcie bianche de biscoti en po' dapertùt.
Eco, adès fora la carta olìata (che no vol dir con su l'oio... l'è quéla trasparente che i vende dapertut).
En mèz tuta sta pasta de biscoti, ovi, zucher, cacao e tut el rest. E fe sù tut come se dovèsse encartar na caramela grossa. Co le so bele reciòte dale bande.
Tut en tél frigo almén per n'oréta. Che el deventa dur (no’ ocor congelarlo neh). E po' via col cortèl a taiàr zò le fete de sto salam dólz.
Cossa béverghe drio? Moscato, del nòs. Ma anche spumantini, bolicine, meio vin bianch séch, no dólz (che no se tàca al dolz).
Ah, el salam de ciocolata no 'l va més ne le ciopéte. Me racomando... lì ghe và el salàm vero, la bondola o altre robe.