Cornelio Galas, saóri/ 11 – Cornetti ai pignoli

>
Na volta èren todéschi anca noi. Sen sèmper taliani ciapài col sciòp.
Tut mal per farli èco cosa che ghe se vol (per vintizinque corneti):
 
Do èti e mèz de mandorle taiade su fine fine, masnade ensoma.
Do eti e otanta grami de zucche.
Quatro ciàre d’of.
Na scorza gratàda zó da ’n limon.
Na ciara d’of per spenelàr a la fin.
N’eto e vintizinque grami de pignoi.
En po’ de buro pu che alter per no far tacar tut nel fónt del forno
 
Mi dirìa che per prima roba dovrésse méterghe en po’ de buro su quela vaschéta de fer che dropé nel forno.
Ben sto buro, dapertùt. No masa però. Eco… ve par che così se tàca zó? Alora metèghe ancora en po’ de buro. No sté però star chi na giornàda demò.
Fat? L’era ora. Adès empizé el forno a zentotanta, dozento gradi. Che entant el scominzia a scaldarse.
 
Adès ciapé le mandorle, el zucher, le ciàre d’of (no tute, una la ve serve ala fin), la scorza de limon gratada e ’n de na padelota scaldé pian pian tut.
Fiama bassa oscia… no dové miga far el budin.
Quando sta pasta la s’è ben misciada, smorzé tut. Lassè che la se fréda. Scòtela ancora? Meio spetàr…
Entant podé anca darghe n’ociada al forno. Ve par che ’l sia zamai calt? Masa? Sbassé n’atimo.
Bom quando la pasta l’è freda giusta, fé en rudol. E taielo en vintizinque tochi gualivi. Dèghe la forma dei cornèti.
Vardé la foto: storti i è i cornéti, storti, tipo mèze lune oscia. Eco, adès na bela spenelada co la ciàra d’of che v’è vanzà (ve l’avevo dit neh de tegnìrne via una…). E butèghe sora i pignoi.
Schizéli pian pian denter sti corneti de pasta crùa. No masa, che se i véda demò.
E alora tut sula vascheta del forno. Lassèi denter en quart d’ora.
I deve ciapàr, i cornéti, en color marón ciàr. No marón scur. No nero, cramento.
Bon, savéme dir. Drio el so bel moscatèl zàlt se ve piàs el vin. E se no acqua, che ve diga…