Adès no te pòdi pù dir «Governo ladro» – Di Cornelio Galas

- Ciao, alora sét contènt nessì che ale tante gavém el nòf governo?
- Sì, dài, ensóma...
- Eh ma a ti no te và bèm propri gnènt alora...
- No, 'l fàto l'è che gh'è tante robe che no me làssa per la quale...
- Tipo?
- Al de là del tiramòla, del prima fago na roba, po' ne fago n'altra, del prima metém en presóm el pòr Matarèla e po' ném a zena ensèma...Nno l'è propri sui ministri che resto en po' sui dùbi.
- Varda che l'è tut zent studiàda e lezùa, zent che sà far i conti neh.
- Sì ma no l'è quéla so màre...
- Spiéghete alora.
 
- Per dìr, Lega e Zinque Stéle i ha semper dìt che no i se meterà mai con quei che fa sporchi afari no? Bém, e come mai una dele ministre de cognome la fa Grilo alora?
- Ma no, la Giulia Grilo no l'è miga parente del Bepe, la l'ha dit tante volte zamài che lo sà anca i sàssi.
- Sarà, ma mi, propri perché no vegna fòra monàe, avrìa zernì una co n'altro cognome almèm dài… Che pò adès quando parla la ministra o parla quel che conta le barzeléte... I dovrà meterghe anca el nome davanti quei dei giornali per no far confusiom 'cramento. 'N po' come el nos Ugo Rósi, capo su en Provinza, se te scrivi «Rósi ha detto», do ponti: podrìa essser quel che core en moto, quel che zugheva al balóm, n'altro che fa rider la zent sul palco... Sat quanti Rósi (ma anca bianchi) gh'è 'n Italia?
- Va bèm, ma no gavrài miga el mùs sol per sta monada chi spero...
 
- No, gh'è altre robe che no me convinze. Per esèmpi: tira buta e mola ala fim quel Savona che no ghe stéva bèm al miniestero de l'economia i l'ha mes ai afari europei... Ma se te gavévi paura che sto chi el ne butés for dai euri... Adeès l'è come averghe dat el mél a l'orso... E po' al so posto i n'ha més tréi adiritura, Tria.
- Osc'ia ma vara che 'l se ciàma propri così, Tria... L'è um sol.
- Dai dai che i ha fat ministro un con do cognomi ai esteri, Moavero Milanesi, così quando el và 'n su el dròpa el secónt cognome, quando 'l va en zo el dropa el prim....
- Te me pàri mat...
- No no, caro e te ne spiego n'altra de gàbola. Ala Difesa Trenta e ale robe dei contadini Centinaio. Ma alora disélo che volè taiàr fora i costi de noi alpini, diaolporco....
 
- Per mi te fai sol casìm coi nomi de sti pori ministri che adès i dovrà galopàr per mantegnir tut quel che i ha promés...
- Sarà tut mal anca quel Fraccàro che i dìs che l'è trentim ma 'l vèi da Montebelùna...
- 'Sa t'àl fàt, pòr Ricardo?
- No, digo, se t'hai candidà en Trentim e i te fà ministro... almem fate meter a l'autonomia ai afari dele regiom... Porta su soldi enveze che star lì a ciacerar en parlamento... Ensoma me sà che anca el Fraccàro prima o dopo 'l ne la... fràca. Te sai 'n dove, no?
- Dai che te derài che i sbassa le tasse...
- Te dìsi? Secondo mi, te derài che prima de sbasàr le tàsse i aumenta l'Iva... Così restém coi istéssi soldi en mam... Ciao valà che vago a brevàr l'ort. Ma hat vist, da quando è nà su el nòf governo no 'l pù gnanca quele do gòze... Così no te pòi pu gnanca dir «governo ladro». Al massimo, forsi, vaffa... De zèrt però miga a quei dei zinque stele... Se no magari i te querela.