El rèdito de citadinànza l'è per i poréti – Di Cornelio Galas

- Ehila Bepi, 'sa fat zà 'n pè a ste ore?
- Ah gnent, do pàssi... giust per mover le gambe.
- Ma se de solit te sei en giro sol sul tardi, dai...
- A dirtela tuta vago da me neó ragionier, el fiol del Fausto.
- Problemi co la pensióm?
- No, l'è che me neó l'ha fat le scole alte. L'ha dit che 'l me desbròia da sto casim che gò en testa.
- Ma vara che se te gài problemi en testa pu che da 'n ragioniér te dovréssi nar da 'n dotór, da quei che con do domande i capìs subit el tài del to zervèl neh...
 
- No, no gò miga problemi de quel genere lì... l'è co ste elezióm en Trentim, che no capìsso tant bem chi nar a votar. E zamài ghe sém neh...
- Ma no sta tòrme per el cul dai, che i lo sa tuti che t'hai semper votà democristiam e pò el Pptt, pò el Dellai...
- Eco, te l'hai dita, de solit gavévo le idee ciàre. Per dirte: quando néva su i democristiani, se te èri dei lori, prima o dopo na mam i te la deva neh. Bastéva farse véder ai comizi, ale riunióm, en ciésa. Magari a lezer Vita Trentina, capìssit come?
- Eh, te gài resom anca ti. Anca mi a so temp, se no gh'era me papà che 'l conosséva quei giusti, miga sarìa nà a laorar ala Rurale. E sat quanti dela nossa età no i ha fàt la naja perché... Sì, tut mal varda che secondo mi, se adès te la ciapi ala larga... Prima o dopo anca quei che dis che no i varda en facia nesuni... qualcòs i mòla, te verài.
 
- Mah, sperénte che la sia cosìta, a ogni modo no savrìa propri chi votar. E me neó 'l m'ha dit che envéze stavolta el gà le idee ciare, che l'è ora de cambiar l'andàzo en sta provincia, cramento.
- E per chi vótelo to neó alora?
- Eco, 'l m'ha dit de nar a trovarlo stamatina sul prest che 'l gà anca da darme dele carte.
- Osc'ia, alora el se candida... El te darà i so santini.
- No 'l m'ha parlà de santini... Po' el gà 'l so dafàr co l'uficio. No credo sat che el se candida…
- I dìs così tuti, po' però, quando i ghe domanda se i se mete en lista... I ariva subit co le foto del matrimòni per la reclàm.
 
- No, me neó no l'è gnanca sposà. O meio l'era sposà ma adès el vive per so cont. El gà anca do fioi sat?
- Eco, te verài alora che l'è per sistemar i fioi. Ghìè semper drio en dàmela tòmela a ste robe.
- Ma varda che i è ancora picoi neh...
- Sì ma i fà prest a deventar grandi, crédeme.
- Sarà. Tut mal vago a veder quel che 'l me dìs. Anca perché ho vist sul giornale che gh'è en sach de zent che se candida come presidente… Gh'è en gazèr de liste, de quei che va anca en televisióm per farse veder mèio.
- L'è semper stada cosìta sat, no l'è miga na novità. Po' ala fim quéle l'è le careghe... no ghe n'è per tuti. Po' con quel che ancora se ciapa a nar en consilio provinciale. Oh l'è come vinzer na cifra al grata e vinzi neh... de pù, soldi sicuri tant al més per zinque ani. Ciàmeghe poch…!
- Beh dai pitòst che i ghe faga la grésta... che i ciàva coi apàlti...
 
- Ma tòme na curiosità. To neó... el fiol del Fausto t'hai dit no? Eco, to neó no èrel quel che quando gh'era Renzi el neva en giro a dar i santini del Pd?
- Sì, l'è vera. Ma l'è zamài da quando i ha pèrs el referendum che 'l s'è tirà fora neh.
- E adès con chi èl finì?
- Eco, volerìa saver anca questo perché prima del marz passà me pareva che l'era ciapà da quei vegnui fora dal Pd. Po' quando se néva for a magnar la pizza el parleva bem del Grilo. E ultimament...
- Zà, 'n do èl finì?
- Te digo sol che sul redito de citadinanza el m'ha fat strani ragionamenti...
- Tipo?
- Che alóra se pol darghelo anca a l'uranio empoverì…!