El trentin al zimitèri nel dì dei morti – Di Cornelio Galas

(L'Enzo a un conoscente)
- Ciao, ciao come vala?
- Eh, dai, fin che se se vede, de zerto meio de quei che è chì sóto
- Ma hat tot anca ti el lumìn a baterìa? Vara che ’l dura forsi en par de dì… ma forsi
-Eh dai, sì poch? Me sa che te te sbagli…l’am pasà el slusèva anca 'na stimana dopo… poch ma el slusèva
- No parlèvo dela baterìa ma de quei che ròba lumìni e vasi de fiori…ogni am l’è la stessa roba, vegnirìa voia de metèrghe en mèz le ortìghe ai fiori, almèn qualche bòla la ghe vei sui dèi…
 
- Scolta, quel che conta l’è el pensèr no…dir do paternoster, pensàr a quei che no gh’è pu…
- Ah sì sì, te gh’ai resòn. No gh’è pu le feste dei morti de ’sti ani. Men, come se ciamèl? Men consumismo no, e anca men zènt che freghèva se sa… se ‘ncontrèva parenti, zent che no te vedevi da ’n pèz, se ricordèva i nòssi pori morti…
- L’è vera, propri vera. Po’ se nèva al bar dele condoglianze a bever el brulé. E tuti a cà a scartozàr maròni…
- Sì, caro, gh’era pu, come se ciàmela? Comunità, pù paés, no come adès che i vive serài denter e i parla mal de quei che gh’è fora…
 
- Eh sì… a proposìt, hat sentù del zendro del Livio?
- No…
- Oscia i lo sa tuti dai che gh’è scampà la sposa. E sat con chie?
- No …
- Col fradèl del Gino Panza… dime ti. Un che prest per mòverse el deve dropàr le rodèle…
- Ma dai… el Gino Panza…no l’avrìa mai dìt…
 
- E déla Gina, la vedova del Ruggero, quela che abita drio la cièsa?
- ’sa gh’è sucèst ala Gina?
- Ma come fat a no savèr ‘ste robe? La Gina zà en mès dopo el funeral del Ruggero i l’ha vista ensema al cosìn del sagrestàn…altro che nar en ciesa a ‘npizàr le candele a so por marì…
- Ma dai che no ghe credo, la Gina, no no pòl esser
- Te digo che i l’ha visti ensèma a balàr e a zena, tacài co la còla, e pù de na matina lù l’è vegnù fora sul prest dala cà de èla… dime ti… bom valà te saludo che i mèi i me spèta zamai per disnàr… ciao Enzo neh, mòlete fora, no stàr semper serà en cà….
 
(Enzo va avanti e incontra un altro amico)
- Ehila, ma ancòi n’encontrén tuti chì…
- Oscia l’Enzo, te me pàri engrassà però… ma sì, fin che se se vede…
- Tei, sat gnent de la Gina?
- No, cossa gh’è sucès ancora a quela pòra dòna… Che l’ha sofèrt così tant quando è mort so marì…
- Ah caro, la se la gode. Pensa, i l’ha vista ensèma a balar e zenàr col cosìn del sagrestàn… gnanca en mes dopo l’hobit de so marì… E del zèndro del Livio? Sat gnent del zèndro del Livio? Spèta che te conto. Alora, en pratica gh’è scampà la sposa. E sat con chie?