Dal massa al miga – Di Cornelio Galas

>
Gh'era na volta, nela Busa (del Sarca bàss o de 'l Garda alt, dipende... da dove ve meté a vardarla) la beléza de dó ospedài, pu ‘na sfilza de sanatori, pù l'ospedàl (vizìm) de Malcésen se te gavévi problemi de òssi, pù ambulatòri dapertùt e compagnia bèla.
Màssa? Sì, forsi l'era màssa. Pensénteghe sóra n'àtimo: dó pronti socorsi, dó posti per farte le operazióm, dó per i malài da curar co le medizine e i flebi, dó posti per quéle che spetéva fioi.
Ensóma, en zinque chilometri drìti, te gavévi i stessi servizi.
Finché i ha capì (no ghe voléva la scala per arivàrghe...) che forsi co n'ospedal sol, en la Busa, se sarìa sparmià qualcòs.
E alora è scominzià la rumba. Quei che voléva sto «monoblòco» (i ghe ciaméva cosìta) a Riva, quei che lo voléva a Arco, quei che diséva de farlo giust 'n mèz (dale bande de S. Tomàs).
E quei che voléva che stèss tut come l'era.
 
Riva e Arco en quei ani (ma no è cambià tant da alóra neh...) i era come cagn e gat.
A scominziar da quei che menéva el toróm nei do Comuni.
Quei de Arco che diséva ai rivani: «Ma cossa volé, pesatèri che no sé altri? Le scòle alte? La féra dele scarpe? La Pretura? I todéschi che vegna en ferie sol da voi? E anca l’ospedàl? Ma no ère voi che ne déva a noi, de Arco, dei “marzóni” per via dei nossi sanatòri?»
Quei de Riva i rispondéva coi comitati per tegnir l’ospedal denór al so lach, col fatto che alora (adès l’è “viceserva”) a Riva gh’era pù zent de quela che abitéva a Arco.
E po’… la tradiziom de l’ospedal de Riva, dai lazzaréti en qua, e dopo… ’n do avréssei dovù nar i forestéri d’istà quando i se féva mal o ghe vegnìva el cori cori? Fin su a Arco? Barèa.
 
Dàmela, tòmela, ala fim quei de Riva (che gavéva alora forsi pu santi en Paradis, cioè a Trent), i avéva vint.
L’ospedàl nòf l’avrìa dovù vegnir su propri drio quel vecio de Riva.
E difàti, sia pur el més del mai e l’àm del miga, el «monobloco», ensoma l’ospedal de tuta la Busa, i avéva scominzià a farlo propri a Riva.
No sté domandarme come la è nàda a finir. Dovrìa tegnirve chì almén per en par de ore.
Disénte che a quela costruziom i ghe ciàma ancora l’«Incompiuta». Na roba enviàda via e restàda lì. Come (fim adés) l’albergo de passo S. Giovani sora Nach, come el centro comerciale pòch sóto, come el teatro de l’ex Quisisana, come tante altre robe piantàde lì perché… perché no se sa bem.
 
Ve digo sol che a n’zerto punto, ne la pareàna che varda vers l’Inviolata, quel «monobloco» l’ha scominzià a perder tochi de piastrèle. E i gavéva ancora da meterghe denter la mobilia.
Po’ en qualche modo i l’ha embastì. De soto i ambulatori, de sora zentinari de metri quadri per qualchedun del Comprensorio prima, dele Comunità de Val dopo, che i paréva quei che ha vist la suìt per prima volta.
E i finiva per perderse… na volta rimbrà el cartelim.
Ma entant el pronto socorso i l’aveva portà a Riva, la chirurgia anca. A Arco era restà sol la medizina (no la farmacia neh), le robe per veci, e se sa, la maternità.
 
Po’ i s’è scorzùi che anca così no la néva bem. Gh’era semper qualche dopiom.
E alora via con n’altro progèto, per portar tut su a Arco.
Tura, buta, mola, quando i ha finì tre quarti del nof ospedal de Arco cossa vei fòra? Che no gh’è pù i soldi per finirlo.
Che no se sa pu cossa far de le vecie Palme (en sanatorio specializà per quei che gà rogne ai polmoni), che Vila Elena (per l’aministraziom) l’è squasi en de pù, che de la vecia pischiatria… Osc’ia ‘sa fente de quel casament?
No ve la tiro per le longhe.
El rest podé lezerlo sui giornai en sti dì.
Via la maternità, via la guardia medica, no se parla pù de spcializaziom.
Gò sessant’ani. Ho zà capì: se dovéss averghe en brut presentimént ciamo subit i me veci amizi dei elicoteri.
Così no fago perder temp a nesùni. E magari vot veder che i me salva?