Cornelio Galas ricordi/ 5 – Emparar a sciar senza skilift

>
I me primi sciòti i ho trovài soto l’alber de Nadàl, disénte zamài en bel po’ de ani endrìo. I èra en ’d’en pachét lónch, fàt co la càrta de giornài.
Ah quando l’ho avèrt… Són stà, me digo, en pàr de ore a vardarli, a tocarli a far finta de avérghei ’n dòs, con me màma che gòséva: «Vàra che così te me sfrìsi le piastrèle del pavimént de la sàlaaaaa!»
Avéva zà fiocà, e tant, en quéla fìn de dezèmber. No stévo ne la pèl da la voia de provàrli.
Co ’na pezòta seitévo a netàrli. Che gnanca la facia me netévo così bem prima de nar a scola la matina.
Bèi, bèi… disèvo da per mi. Finché a forza de róterghe le bale, me papà el m’ha cargà tuta l’atrezatura (anca i scarponi, quei che se ghe metéva en par de dì a ’nzòlarli) sula Seizènto. E via vèrs Vèl.
E po’ ai piani de Santa Barbara, vers Ronzo. Eco, proprio lì dove gh’è ancora me par el capitèl a S. Barbara, cóle bombe zà sciopàe entorno per capirne, propri lì, en po’ prima de l’alberghét, sula destra vegnendo da Vèl, gh’era en dòs.
 
Me papà el m’ha tirà zò, dal davanti, do bei ganci a mòla, el m’ha més en man do rachéte de bambù (che al prìm colp giust po’ le s’èra róte neh…) e ’l m’ha dìt: «Cornelio, pian pianìm và su ’n zìma al dòs. Vàra se fa cosìta: questo se ciàma nar su a scaléta. Piam, piam. Che dopo te digo come fàr».
A metà de quel che me parèva l’Everest, rós come en peverón, strach prima ancora de scominziàr, el giuro: ho vist Santa Barbara che la me féva ségn de stàr atento ale bombe… che ’nveze l’era i famosi capùssi dela Val de Gresta o ’na roba che ghe somigliéva. Ogni tànt i butéva su dala néf…
«Dai, vòltete e bùtete zò adès, tègnete ben piegà ’nvanti, slarga gli sci drio e tègnei vizini ne le ponte. Eco, questo se ciàma spazaneve: quando te sarài bòm de far ben el spazaneve t’ensegno el cristiania, coi sci streti, gualivi.»
A cossa servìs spazàr la néf dove envéze la servìva per sciàr no l’ho mai capì.
Ho capì subit però che quando coi sci te ciàpi l’anda e no te sei bom de frenàr… te vai a svoltolóm. E nò ’na volta sola. Almen dóe, trée [la seconda «e» di trée va messa perché 3 è plurale… – NdT], anche quatro, dipende da come l’è l’anda che te ciapi. O se prima te trovi le rame d’en ninzòler, se va bem, le dàse d’en pim, se va mal, ’na bóra grossa de fagio se la va ancora pu mal.
 
Ghe la metévo tuta neh, ma no l’è véra che a nàr en zó ogni sant te aiuta. Perché Santa Barbara da quel dì no l’ho pù nominàda. Meio dése Ave Maria pitòst…
A me papà, dai e dai, devo avérghe fat pecà, perché el m’ha dit: «Eh, ’l so mì perché sti sci no i va bèm, i è senza làmine. Doman matina en falegnameria taio zó do fileti de fèr e te le ’nguìdo soto. Te derài che alora i scì i tèi de pu.»
Col temp ho ’mparà a sciàr, anca bem dai. Pu bem de mi (e som stà mì a ensegnarghe…) i ha ’mparà me fradèi. El Mariano, maestro de sci e adès un che ensegna a sciar perfìm ai maltési. Ma soratùt el Paolo, che l’è deventà istrutór e ’l ghe fa i esami a quei che vol deventar maestri, pensa ti.
Ho fàt anca gare de tuti i tipi e ’n tuti i posti. Mai deventà en campióm come me fradèi perché a ’n zerto punto me piaséva pù el doposci che el sciàr. Propri lì ho fate l me prìm giornalìn: el se ciamèva «el Bucaneve». Con interviste a quei de Arco, del Sci Club Arco, che néva ala Marcialonga, con tuti i risultati dei bòci nel sci, nel fondo, anca cole slite (le sorèle Ischia le era le pù brave). Po’ le premiazión de solit i le feva a Campiglio, en de na discoteca.
E ho scominzià lì a capir che forse le morosòte le era meio che finìr a svoltolóm nela nef.
Tra l’altro, ’na volta, propri a Campiglio, en dena gara de discesa libera che finìva nel Canalom Miramonti, ho ciapà la prima grossa ciavàda. Ero su pronto per partir quando scominzia a nevegàr. Un dei boci, pu bravi de noi che partìvem con numeri alti el me fa: «Dài prestami gli occhiali che te li riporto su in tempo per la tua partenza».
Pù vist. Né lù, né i ociai e gnanca la pista vedevo: en macióm bianc davanti ai òci pieni de nef. Arivà ’n zima al Canalóm ho fat en salt me digo de dése metri e som aterà come en misile.
Pòm nela nef co le ponte dei sci, crac de drio. Sci taiàdi en dói e ’n màl de testa de gambe de brazi per ’na stimàna.
 
N’altra volta envéze, a Bordala, fàgo na prima mansch ala Thoeni. Sento che vago bem, volo, magno i paléti un drio l’alter.
Arivo zó tut contènt e vedo che tuti i me varda en maniera strana. «Ma come, oscia, no me par de aver fat ’na discesa da lumàz…».
Me papà el me fa segn. Vardo dove el me dìs de vardàr e su ’sta pista gh’è en segn ros che va drio a tute le porte.
Ma dài, digo da per mi, i gh’ha més anca el color perché no sbagliénte direzióm?
No l’avevo vist… Eh ma en gara te sei ciapà da altri penséri…
Me papà el me dìs de vardarme la gamba zanca: en sbréch de vinti zentimetri, sangue che vèi for dala tuta come da ’n rubinét.
Eco, la pu bela gara de slaom gigante de la me vita l’è finìa con trenta ponti a l’ospedal.
Taià per el sci mi? Pu de così…