Lezùi, studiài e... quei che 'n sa de tut – Di Cornelio Galas

Dopo el covid, la guera. E alora, en televisiom soratùt, cambia anca quei che parla (en pònta) de 'sta nòva rogna.
Prima quei che savéva tut sui microbi, sule mascherine, sui tubi da meterte nel nàs e come zercar de no finir soto tera.
Adès quei che anca da 'n tochét de razzo i te sa dir chi èl che l'ha fat e da dove i l'ha sbarà.
 
Prima mèdizi (ma anca zent che no ha mài dàt en pónt en vita soa), ades generài, o quei che i s'è specializài en «geopolitica» che sarìa em misciòt tra geografia e politica.
Cosa vegna fòra da sto gióm no se capìs bèm.
Ma quel che conta l'è dir qualcos en taliàm coregiuto. Che dàga l'idea...
 
En sti dì (passà zamài pù d'en més neh) de guèra en Ucraìna (acènto su la i, ma tanto dopo i fa tuti quel che ghe par) n'avém sentì e ne sentirém ancora de tuti i colori.
Che se i russi i ha tacài via per primi per esempi anca i ucraìni no l'è che i sia propri dei santi in tera per quel che i ha fat a so temp.
E cosìta anca quel che i te fa veder en televisiom podrìa esser na «méssa en sèna» come dis i russi.
Pecà che giùst en sti dì sia cascà quel razzo en de na staziom dei treni... Ma anca su quel i russi i gà da ridir.
Così come vei fòra cine de prisonéri russi copài dai ucraini.
 
Eco, su ste robe, tanti de quei lezùi e studiài che se sente en televisiom, i dìs de nar coi pèi de piombo, de star atenti ensoma a no ciapàr per oro colà quel che da na banda i ghe ciàma apunto oro ma en giapone i ghe ciàma otóne.
 
Ala fim no se gh'en vèi pù fòra. No se sa pù a chi crederghe.
Depù: no se crede pù gnanca a quel che i te fa veder.
E cosìta sem pezo de San Tomàs. Che almém el gavéva el Sioredìo vizim en quel so vizio de no creder se no se tocca.
 
Fato sta che en Ucraina la guèra la gh'è per dassém. No l'è en cine.
E tuti quei pori disgraziai che scampa lassando tut quel che i gaveva no l'è òmeni, done, boci pagai per far «mucio» en scène dove se deve far veder tanta zent ensema …
De zèrt, prima o dopo (de solit pu dopo che prima) qualcòs de pù se saverà. Ma sarà sèmper tardi, massa tardi.
 
Eco, me piaserìa però, da chi a qualche am, che i fés sentir de nof quel che tanti lezùi adés i dis en televisiom.
Ma som sicur che - come ha fat tanti politizi taliani veci amizi de Putin en sti di chì – i vegnirìa zó dal pér: «Mi ho dit quele robe perché en quei dì no savevém che...».
Ensóma, savé cossa che l'è en guìndol? L'è en taliam l'arcolaio, qualcòs che serve per desgartiàr le matasse.
E 'l va semper de corsa, de qua e de là. Sì, gavrém tanti guindoi tra qualche temp...