Na giornàda da 'ncornisàr – Di Cornelio Galas

Hat vist? I scominzia la bretèla Lopio-Busa… E l’Iva no l’aumenta… E i ha més un dela Lega a dar for le case de l'Itea ai arabi...

Dìme che no sogno. Dìme che no l'è véra.
'Cramento, no pòl èsser: dàme 'n pizegòt, valà. No, dài, dì giuro...
L'è 'n sàbo come tanti altri. Ale tànte vègno fòr dal lèt. Empìzo la televisióm e vàrdo el televideo, se sa.
Sol per savér se l'Inter l'ha comprà qualchedùni altri da l'Atalanta... zamài m'enteréssa sol quel.
E osc'ia, cossa védo? Ultim'ora: a Brussèls i ha dìt che i ha capì come sém messi en Italia zamài da ani.
I ne tira via en tot del debit. E i ne dà anca depù soldi per i teremotai.
 
E no l'è miga finìda chì. Vist che el Tramp l'ha més su i dàzi sul vìm, l'oio, le Piàgio e compagnia bèla... i ne tìra zó anca la diferenza.
L'Iva? Ma no che no l'aumenta, l'è le solite monàe messe en giro dai comunisti. No, i la tìra 'n zó, envéze.
E i ghe darà anca en tài a tuti quei politìzi che ciàpa la pensiom prima del temp: con quei soldi lì se podrà anca sbassar le tasse.
 
En Trentìm la và ancora meio. Oh, lèzo semper su Televideo de ancòi neh. E se lo dìs la televisióm vòl dir che l'è vera.
Domàm tàca via a laoràr le ruspe per la Lopio-Busa. Diré: osc'ia, propri soto Pasqua? Alóra speté altri trent'ani se ve piàs cosìta.
Prima o dopo bisogna fàr gazèri per meter a posto. Come quando se sbianchéza en casa...
Quei del Patt i ha fàt pàze. Rossi l'è nà da Kaswalder. El gà dìt: «Dài che scherzévem».
Po' i è nai a magnar en tóst al bar Mudanda de Vigo Baselga. Gh'era anca l'Otóbre anca se 'l dovéva vegnir en autùm.
 
El Trent l'è demò zà en serie D del balóm. I è nài - i so capi - da quei del Dro per vedér de meterse ensèma.
Ma se sa, quando quei de Dro i dìs «te la càcio», en pratica «te la gàì zà 'ntorno». No s'è fat gnent. Almem per adès.
I ha méss capo de l'Itea ùm de la Lega. Che l'ha dìt subit: «Via i arabi, via i teróni».
El prìm a esser parà via l'è stà lù che l'ha sposà a so temp una de Fogia.
 
El giornale l'Adige l'è stà vendù a quei che ha zà comprà el Trentino. L'unica rogna adès l'è come ciamàr sto giornale unico. Trentinadige? Adigetrentino?
Um l'ha dìt: «Dài che 'l nome no 'l conta. Ciaméntelo Athesia e finìda lì».
A l'Irst de Trent i ha enventà en robò che pensa per so cónt. El gà tute le lègi de sto mondo encorporàe.
El fa tut a posto. I dìs che ale prossime provinciali el Rossi (se no l'va a Roma) 'l la gavrà dura.
 
I ha 'nventà, propri algéri, en sistema per sciàr anca senza la néf. Tòchi de mochèt - i vèi da l'Aquafìl de Arco - che te sròdoli en montagna. Sora 'n pél de aqua col saóm. E via che nare.
Tut bèm? No, perché se l'aqua l'è agratis (e tut mal per i cannoni dà na mam anca la Provincia) per 'l saóm gh'è zà ricorsi al Tar de le dite lassàde fòra da le gare dei apalti.
I schùtzen i è encazzài. Perché a so temp el Panizza el gavéva comprà le divise nòve. Ma l'ha desmentegà le scarpe. Ma da ancòi basta na piuma de gàl zedróm per ciapàrne en pàr de nove.
 
L'Aquila Basket l'ha comprà en nòf zugadór. Alt, bravo. El podrà zugar però sol st'am che vei perché l'è ancora empegnà nel canestro en Merica... nel senso che i no rièsse a desgartiàrlo da lì.
È vegnù la ministra Lorenzin en Trentim ieri. Prima l'era stàda a Arco... So fiòla, che la ghe stà sèmper drio, la doveva partorir. Arivada ale tante - co l'elicotero del Renzi - a Trent l'ha dit: «Ma chi èlo stà a tirar via el punto nascita a Arco... propri en bel deficiente».
E varda varda 'sta notizia: «Set separà, set divorzià? Quel che te paghi de alimenti el tirém via al to afìt».
Um vizìm a mì el scórla la testa: «Varda che nesùni i te dà gnènt per gnènt, a l'augen...».
 
'Cramento, me vardo 'ntorno. Qualchedùm m'ha tirà adós aqua freda.
Vardo el calendari: no, no pòl esser. Ancoi l'è sàbo, prim de april.
Ma me l'èro entaiàda neh... No som miga vegnù zó co l'ultima nef.