Altro che el vaiòl dele scimmie... – Di Cornelio Galas

Come dìs la regola de Màrfi, se na roba la va stòrta... la pòl anca nàr pèzo.
Ensoma, dopo el covid, dopo le varianti del covid, che zamài no se conta pu su do mam, dopo el clima che fa semper pu calt... dopo la gèera en Ucraina, ghe manchéva sol el vaiòl de le scimie.
E me sa, come dis propri el Màrfi, che no l'è gnancóra finìa.
Vèi da dir che vivem propri en ani difìzili. Con casìni che gnanca podévem enmaginarne... Altro che l'Italia del balóm restàda fora dai mondiali.
 
Sta storia dele scimie però... che dir, la me lassa en po' dei dubi.
Così come quéla che el coronavirus el sarìa vegnù dai pipistrèi, per quela, ma se en Cina i magna anca cagni, gati (dev'esserghe via na colonia de veci rovigoti), bestie che... basta che le respira fin quando i le copa…
Bem, quela dele scimie me par na roba che no la sta né en zél né en tèra. Al massimo su na pianta de banane.
 
Perché, me domando da per mi, come pòl suzéder de ciapàr sto vaiòl se no te vài en Africa o nei posti dove gh'è la scimie? Perché te gài dat na nociolina a na scimia al zoo? O na scimia la t'ha pissà adòs quando te févi la foto ensema davanti al circo?
El fato che po' ghe sia zà pronti milioni de scatoléte de medizine contro sta malatia... No so, ma el me spùza ancora de pù.
 
Vegnirìa de butarla en vaca. Però no se sa mai coi tempi che gira. Te risci de passàr per en no-scimiax, ch'en sàt?
Però la barzeleta la gireva prima de sti casini. E l'è questa.
Do embriagoni i vei fora dal bar. I va en qua e 'n là. El fa uno a l'alter: «Oscia, me sa che gò 'ntorno na scimia de quele...»
E l'alter: «Varda che fin quando la scimia te la gai entórno no la te fa gnènt. L'è quando la te vèi endòs che l'è na bruta bestia.»
 
Tutmal preparéntene a altri casini. Perché me sa che col vaiòl de la scimia no l'è miga finìa.
Per esempi, no so se avé sentì parlar del rafredór dei pinguini. Anca questa la è colpa del clima che cambia.
Dal calt al frét e dal frét al calt. Così i pinguini te i vedi en giro co la góza al nàs. E quando i sternùda ocio... che le gozoline le è contagiose anca per l'òm neh.
 
Po' gh'è altre malatie che se pòl ciapàr dale bestie.
El storzicòl dei bìssi... che te vai a zig zag e te sèiti a vardarte endrìo.
Gh'è anca robe che te ciapa la testa. E te par de esser deventà en sórz.... Eco, quando te ciapi sta rogna al zervél praticamente te sei...del gàt.

La rabia, quel s'el sa, te podi ciapàrla dale vólp.
Enveze da temp gh'è na malatia che colpìs soratùt i veci o quei che de solit i magna tant. L'è el «mal de l'agnèl».
Cossa elo che 'l fa sto màl? Praticamente se slàrga la pànza e se scórta...
Dài che savé anca voi quel che se scorta.