La primavera en dì prima – Di Cornelio Galas

No se finìs mai d'emparàr a sto mondo. L'alter dì ala televisiom i ha dìt che è scominzià la primavera.
Osc'ia, me som dit, va bém che da quando som en pensiom no me ricordo pù gnent dal nàs ala boca, ma adès la primavera tàchela via 'n dì prima?
Som nà alora en cosìna, vizim al frigo dove gh'è el calendario del Zamboni. Che l'è comòt neh.

Entant perché se pol scriverghe su se manca el zucher, el sal, i ovi... E dopo perché el segna tute le feste e anca el mudàr dele lune, per dir.
E cramento, el vinti de marz l'era el dì che i ha dit quéle robe en televisiom, no 'l ventùm.
E po' fim da puteloti, da l'asilo dirìa, i n'ha semper ensegnà da quando a quando le dura le quatro stagiom.
E se te ghe disevi ala maestra che la primavera la taca via el vinti de marz prima te ciapévi en brut voto e dopo en slavadenti dai tòi quando te tornevi a cà.
 
Se sa, quel che i dis en televisiom miga semper l'è giust. Oh, pòl sbagliar anca lori.
E alora per vegnirgh'en fòra som nà da 'n me amico che fim da bocia el gà sta pasióm per el sól, le stéle, la luna e de come la tera la se svòltola nel zèl così da far nàr zo e su el sol, far vegnir frét e calt.
Bèm. Sto amico che mi de ste robe no ho mai capì gnènt, l'ha scominzià a spiegarme sta storia de la primavera bonoriva come na volta i spieghéva el modo che fa nasser i boci.
Cioè partendo dai fiori, dale àf per finir ai capùssi: che l'è sóto quei che i nàsse ancora no?
Ensoma 'l l'ha ciapàda larga e longa. Per arivar a dirme che sì, la primavera l'è squasi come la Pascua. Che la vèi semper de domenega ma mai nel stés dì e més.
Odìo, la primavera – el m'ha spiegà – no l'è propri così balerìna. St'am l'è vegnùa («se fa per dir» m'è vegnù da dirghe) marti vinti marz ale zinque e 'n quart de dopodisnar.
E la narà cosìta fim al domiliezentodó (2102). Anzi, nel domiliequarantaquatro (2044) la vegnerà adiritura el disnòve de marz.
Per farla corta de zèrt no vedrò mai pu da vif la primavera… vera, quela che taca via el vintùm de marz.
Sarìa zà tant arivar a veder quela che scominzierà el disnòve dai, metentela cosita.
 
Bòm. Ma perché de colp vèi fora che sta primavera la vèi prima del solit?
Colpa dei gas che va su per aria, che scalda la tera, che no se capìs come mai al Polo se cóla i giàzi e magari névega nei deserti africani?
O èlo perché a forza de far su case el perno del mapamondo l'ha zedù al peso e no sèm pù a piombo?
 
«No, no – el m'ha dit l'amico – lè na roba che gh'è semper stàda. L'è per via de l'equinozio.»
«'Sa che z'entrei i cavai?», Gò dit.
E lù: «No mona, equinozio vol dir en pratica el moment giust che la nòt l'è gualìva al dì.»
E mi: «Ma me tòt per le bale? La nòt no la sarà mai gualìva al dì. L'è come dir che el bianch l'è gualìf al scur no....»
E lu: «No, volevo dir che l'equinozio de primavera l'è propri quel moment giust che, se tussi sentà a l'equatore… te sai no cosa che l'è l'equatore? Spero de si... Bem, se te fussi sentà propri su l'equatore, meio, en d'en posto giust pu o mem en mez a l'Oceano Pacifico...»
E mi: «Come fago a sentarme su l'aqua?»
E lu: «Ma se fa per dir. Va bem, meti che fussi su na barca giust en quel posto lì, eco, en pratica el sol el sarìa propri al zenit.»
E mi: «Cossa èlo, na discoteca en mez al mar? E gh'elo sol lì el sol en quel momént?»
E lu: “Fàme finir. En pratica da 'n satelite su alt mi te vedrìa propri sul colmo. Da na banda la metà giusta dela tera la sarìa al scur, de not ensoma. Da l'altra enveze sarìa dì, semper per metà de tut el mondo.»
Ve dirò che mi gavévo subit fat capir che se som en mez a l'Oceano Pacifico no l'è posibile che da na banda e da l'altra, col sol o senza sol, ghe sia la tera.
Ma el me amico, che no ho mai vist sì zidiós el m'ha tirà en testa el mapamondo (de plastica per fortuna) che 'l gaveva sul so tàol e l'm'ha dit: «Védit adès la tera o sol le stéle?»
 
E da alora no 'l me parla pù. Se provo a telefonarghe el risponde semper: «Ancoi gò la luna, meio te me me staghi ala larga».
Sta roba de l'equinozio tut mal no la me convinzeva tant. Alora som nà da ùm lezù e studià.
«Spiegheme bem – gò dit – sta storia de la primavera che la vèi prima del temp.»
E lù: «Caro Cornelio l'è per via de l'equinozio, che …»
E mi: «Férmete, férmete che per l'equinozio gò ancora na brugnòcola en testa e sarìa longa la storia da contarte....»
Lu alora l'ha scominzià a parlarme 'n taliàm corezù:
 
«La questione è legata al nostro calendario, quello gregoriano, che seppur accurato non rappresenta in modo identico l'anno siderale, ovvero il tempo che la Terra effettivamente impiega per compiere un'orbita attorno al Sole.
«Esso infatti ci impiega 365 giorni, 6 ore, 9 minuti e 10 secondi a fronte dei "soli" dei 365 giorni del calendario.
«Per mantenere sincronizzate le due misure ed evitare lo slittamento delle stagioni, è stato introdotto il sistema degli anni bisestili, che prevede l'aggiunta di un giorno alla fine di febbraio (in generale) in tutti gli anni non secolari (che non segnano il passaggio di secolo) divisibili per 4.
«Nonostante tutta questa serie di aggiustamenti l'equinozio sta graduale slittando all'indietro, anticipando rispetto a quanto succedeva nei secoli passati.»
 
Quando l'ha finì el m'ha dàt na sgomitàda nel stomech.
Come dir: «Dai che adès te podi far bela figura quando i te domanda come mai la primavera la vèi sèmper prima del tèmp».
 
Sarà perché entànt m'ero endromenzà, sarà perché dopo na magnada de carne salada quel colp al stómech el me feva vegnir su tut, fasòi en bronzom compresi, ho alzà la mam come dir:
«Te gài resóm, ades però devo nar.»
Resto tut mal de la me idea: «La primavera èla vera come l'ultima?»
E mès el maiom, i scarponi, el giacòm som nà a tor el pam entant che fiochéva... Anca se l'è primavera zamai da do dì.
Però spèta, spèta... doménega no se deve butar envanti de n'ora i orolòi? Vot veder che vèi prima anca l'istà st'am?