Cornelio Galas, saóri/ 10 – El «tirtlàn»

>
Che ’n disé de farve na bela magnada de «tirtlàn»?
Cossa che l’è el tirtlàn? Disénte che l’è na roba da magnar, bona, che i fa en Val Pusteria, su en Alto Adige.
Ma i sa farla anca i ladini. Che i ghe ciama envéze «turtes».
L’è, ala fin, dei gran ravioloni, friti, pieni de bòni saóri. V’enteressela la riceta? No? Alora baséve el cul.
A quei che ghe spìzega la curiosità envéze…
 
Entant preparé: zento grai de farina de segale (la trové, la trové… no sté preocuparve che la trové), po’ zentozinquanta grami de farina de frument, en cuciar de oio (semper meio quel del nòs, extravergine de l’alto Garda, ancor mèio quel de Vignole se sa), n’òf, en po’ de late tèpit e sàl.
Tuta sta roba chi per far su la pasta che po’ servirà per méterghe denter el rest.
Per el rest, el ripieno ensóma: en cuciàr de buro, trenta grami de zìgola taiàda su fina fina, dozentozinquanta grami de ricota, zento grami de patate cote e passàe, en cuciar de santìgola, si ensoma, de erba zipolina, sal e pever. Dai che no avé spendù chisà cosa…
 
Dài alora, con quel che v’ho dit de preparar per la pasta scominzié a empastar. Dai che fa ben mòverse… avànti e endrìo, endrio e envanti… liscia la deve vegnir fora sta pasta, bela liscia… Ve pàrela liscia? No, enveze, dai che podé far de meio… eco, adès lassé polsàr tut per ’na mezoréta.
Entant podé preparar el ripieno.
Sfriteghé en de na padela la zigola col bur. E butéghe denter po’ el rest… Misciar ben che no se taca zò tut.
Ala polsà el giust la pasta? Ben, voi però no podé polsar perché adès vei el bel.
 
Da la pasta dové far vegnir fora tanti dischi. Come? E quant grandi?
Ciapé en piatìm dela chichera del tè, pozélo sóra la pasta e néghe entorno col cortèl… Se no ciapé na scodela granda precisa e schizéla su la pasta…
Fati i dischi? Bon, empizé el giradischi e scoltévei ahahahah.
Dai che scherzo. Ciapé en disco, metéghe denter el ripieno (no massa, oscia, che po’ vèi for tut). Sóra n’altro disco. E struché entorno entorno.
Po’ buté sto raviolon nela padela dove l’oio l’è calt, calt. Nò che el fuma però.
E quando ve par pronti (sel vede dal color) tiréi fora e metéi su na carta che suga. E via che la vaga.
Cossa beverghe drio? Na bela sciavéta i me dis. E se no’ alzé massa el gómbet va ben anca en marzemin de Isera.
Bon… Ala prosima.