L'ultima copia del «Trentino» – Di Cornelio Galas

Nel domiliesète era vegnù fòra en libro (L'ultima copia del New York Times), scrit da l'alora vicediretor dela Stampa Vittorio Sabadin, 'n dove se féva anca na previsióm de quando quel giornal mericàm no 'l ghe sarìa stà pù, almém su carta: 1943.
Questo perché – se 'l scriveva el Sabadin – tra compiuter e bàle varie, nesuni i avrìa pù crompà en giornal fat ala vecia maniera.
 
El Trentino (che na vòlta l'era l'Alto Adige, l'ha serà envéze prima.
Algéri nei tabachini, la so ultima copia – su carta – anca se i dis che se poderà ancora lezerlo sul compiuter.
Forsi non tuti i ha capì cossa vol dir, dalbòm, sto fàto.
E ve parla tra l'alter um che ha lavorà per oltra quarant'ani a l'Adige, propri el giornal concorente, quel che, almem fim a qualche am endrìo, l'era càn e gàt col Trentino (e ancor de pù co l'Alto Adige).
 
L'è 'l caso alora de tornar endrìo – e tant – coi ani per zercar de far capir cossa vol dir, anca 'n de na provinza picola come el Trentim, restàr senza um dei giornai che da 75 ani l'era deventà depù de qualcos che se leze denòr a 'n cafè tuti i dì.
Bem, se né su Wikipedia (vist che adès anca per i giornai se deve averghe 'l compiuter) podé lézer la storia entréga de sto giornal, nat dopo la fim dela seconda guera grazie al comitato de liberaziom nazionale.
Po' tanti cambiamenti, fim al diretor Visetti che l'aveva cambià nome en «Trentino».
E zó e zó, quando l'Athesia en pratica l'ha crompà tuti i giornai (e anca Radio Dolomiti per dir).
 
Eco, se devo dir la verità, quando de fato gh'è stà quela che i ciama «concentraziom de testate» m'ero entaià che prima o dopo i avrìa fat fòra (su carta) l'Adige.
E difati, quando i ha spostà la stampa de l'Adige da Trent e Bolzàm me sòm dìt: «ghe sém...».
Envéze, dala matina ala sera, come féva zerte fabriche che nei ani setanta le portéva via le machine de not, i ha serà su baraca e buratini.
Giornalisti en cassa entegrazióm, tut sul compiuter e bonanòt sonadòri.
 
Diré: beh, vorà dir che adès tuti i cromperà l'Adige (che l'è de l'istéss paròm) no?
E tut mal almem en giornal de carta del Trentim se 'l troverà ancora.
Ma no l'è quéla so màre. Perché se no gh'è la concorenza, capiré anca voi che 'l riscio l'è quel de far finta de no averghe pù gnanca quel che te spònze sul cul tuti i di, e che te fa sèmper star atento a scriver... meio.
 
Nel modo de dir dei giornalisti se ciàma «bus» quando i altri giornai i gà na notizia de quele grosse che ti no te sei stà bòm de tirar su.
E, disentelo, oltre che a dar sodisfazioóm, «dar en bus» ala concorenza l'ha semper fat vender de pù (en quei dì) anca el giornal che quela notizia 'l la meteva bela granda nela locandina.
Propri perché 'l savéva che l'avrìa encuriosì anca quei che de solit i crompeva l'altro giornal.
 
Me ricordo tanti dì bei (quando se déva el bus) ma anche tanti dì bruti (quando el bus s'el ciapéva). En redaziom se podeva volar come dirigibili opura finir co le bale che tocheva el paviment a seconda de l'um o de l'alter caso.
L'era na guèra che scominziéva ogni dì de matina bonora e la finiva sol quando i te diséva che la tipografia l'aveva zamài seràda (anca se gh'era le famose «rebatùe» magari...).
 
Me ricordo na volta, quando el pòr Sergio Molinari (che 'l lavoreva al Trentino) el m'aveva telefonà vers le sète de sera.
«Ciao Cornelio. Volevo dirte che domàn te ciaperài en bus… Ma che digo bus, na voragine...».
E l'aveva més zó.
El m'aveva, come se dìs, lassà en mua. Co n'agitazióm che l'ha m'ha fat far robe da mat.
Tipo far pù giri de nera (telefonar a carabinieri, polizia, pompieri) ogni dése minuti.
O nar en giro per i bar de Riva a dar na snasàda, come diseva el por Armando Detassis.
Gnent.
 
La matina dopo gàvevo paura a vardar el Trentino.
Po' me som fat coragio e... no gh'era su gnènt che se podés considerar en bus.
El Sergio, quel mona, el m'ha telefonà vers mezdì.
«Scométo che no te hai serà ocio stanot... ah ah ah.»
 
Se ho ricambià el schèrz? Podé scometerghe...
Ma questa l’è n’altra storia.