Cornelio Galas ricordi – L’ors en Sardagna

>
Che no l’è ’n Sardegna, no, sòra Trent, dove arìva la funivia. Eco, lì gh’era na grant busa de cemento e denter gh’era l’ors.
Quando me papà, marangón, el néva a far mistéri su per Trent, el me diséva sèmper: «Se te sei bravo e te dài na man a portar su i sperèi, dopo nem coi operai a magnar el polo al spiedo dal Viola. E prima de vegnir de volta a Vignole te porto su a veder l’ors.»
Su le prime pensévo che el me tolés en giro. Ma sì, l’ors. L’avevo vist sol sul «Conoscere». L’ors ? No capivo, no avevo zamai vist n’ors a parte quel en televisiom che robéva le marende.
E enveze el gh’era per davera. Propri quel de la foto trovada en d’en vecio scatolom.
Grant, svelto. Sula scaléta. No ’l me parèva catif ma sol seà.
L’era istà e poréto se vede che quel che ’l gh’avéva nel fossà no l’era assà.
La me féva pecà quela bestia. En mam gh’aveva en toch de pam biót per marènda.
N’ho sbregà en tochetìn e ghe l’ho butà zó. Ma quel, l’ors, el m’ha vardà malament. Come dir: «Bocia, vara che no som miga en paìt e gnanca en lugherin…».