El trentin al corso de ginastica per veci – Di Cornelio Galas

(La moglie)
- Vara che è arivà el giornalìm de l’asociaziom… Oltre ala gita al santuari de San Romedi me par che ghe saria anca en corso de ginastica… El te faria anca bem… Semper lì engiomà a fumar e lezer ’l giornal… Che ‘n dì o l’alter te resti séch lì su quela caréga…
- Ma sì valà ginastica… che dopo me fa mal la schena per do mesi…
- Ma vara che l’è ginastica per veci… No i te fa miga far chisà cosa po’… dai dame da ment na volta…
- Fame lezer… che po’ bisogna anca veder quant che ’l costa neh… che chi co la pensióm no ghe stém miga pu dénter a forza de tirarne fora per quést, per quel e per quel’alter… beh, dai… mah…
 
(Al bar con l’amico)
- Tei, t’èle arivàde anca a ti le carte per quela ginastica?
- Sì, ma te dirò, no l’è che sia tant per la quale, no l’è che strangossa per nar lì a sudar… anzi, a pagar per na sudàda…
- Scolta però… me sarìa vegnù n’idea…
- Oscia, quando a ti te vèi l’idea po’ l’è sèmper rogne…
- No, no, ’dès te spiego…
- Sentinte… ma vara che no voi gazèri come le altre volte neh…
- Scolteme mi… ne fem dar dale spose i soldi per l’iscriziom… Fem finta de firmar le carte e dopo…
- E dopo? ’Sa gat en mént de far… Vara che te l’ho dit, no voi gazèri…
- Ma cossa vot che vegna fora… Lasseme che te spiega…
- Sì demò sbrighete che dovria anca nar a veder se i m’ha fat i novi ociai… e tor qualcos da magnar per mezdì…
 
- Alora, te disevo, fém finta che ne sém decisi ale tante: ném a far sta benedeta ginastica.
- No capisso. Come, ném a far ‘sta ginastica, se né mi né ti volén savérghen de farla…
- Speta, speta. Fem finta t’ho dit. Firmem ste carte davanti ala sposa, ciapém i soldi e nem…
- Nem en dove? Se t’hai zamai firmà e pagà ’n do vot nar pu che en palestra a far ginastica…
- Te sei propri entréch, dur a capir le robe… T’ho dit fem finta… Na volta for dala porta ne trovém su dal Berto… Na bela partìa a briscola… Do bele luganeghe taiade su grosse… Do tochéti de grana… I so bei bicieròti… Che te sai che lue l gà quel marzemin… che fa resusitar anca i morti no…
- Te la fai fazile ti…
- Ma valà, coi soldi del corso de ginastica… Ne vèi fora do di ala stimana come i sceìchi… en paze… Le spóse for dale bale…vot meter?
- Se tel disi ti…
 
(Dal Berto)
- Berto, Bertooo oscia, vara che chi piati e bicieri i pianze come le vigne…
(Berto): Elamadona…ma avè zà fat fora tut? S’è propri de le lòre… vegno vegno… ma le spose no disele gnente?
- Berto, chi sul tàol ghè i soldi. Vara tègnete anca el resto così te te paghi en piatìm de afari toi… Ahahahahahah! Onte dit ben? Dai dai che tanto el so (rivolto a l’amico) che no te gai gnènt en man butà zo…buta zo… Ècola la briscola che ciapa tut… Ahahahaha!
 
(L’amico)
- Oscia, vara che zamai le saria nade le do ore de ginastica… Fórsi l’è meio nar a cà…
- Cossa vol dir, sem nai a ginastica, sem strachi, gavem sé e sém chi al bar che bevem qualcos… Vara. vara… son zamai tut sudà…
- Sì, ma l’è l’efeto del vim quel no dela ginastica, dai che no vòi gazeri…
- Ma cossa mai vot che vegna fora… Dai bina su la carta che te strangolo anca stavolta me sa… eco, eco… e con questa spazém su tut ahahahahaha… Mèio che te zughi a boce valà… almem lì ogni tante l balìn tel tochi… ahahaha!
 
(Arrivo a casa, la moglie)
- Alora com’èla nada ’sta ginastica… Oscia no te farà miga mal ala circolaziom… che te me pari rós come en peverón…
- Eh dura l’è… almém le prime volte…
- Però te derai che te fa bèm mòverte…
- Sì difati… No pensevo… ma oscia… sì …l’è che i te straca… No sem miga pu come quando èren putei…
- Ah ma alora ghe telefono mi al professor de ginastica… Ensoma… i dovria narghe pu lezeri… Che no vègna fora che te me fai n’ictus… Ghe mancheria sol quela…
- Ma no, no…no ocór. L’è perché le prime volte se sa la carne l’è greva no…
 
- Ma fame en piazér… vara en che condizióm che te sei lì… No, no ghe telefono… En cont l’è far ginastica n’altro coparse, far sforzi…
- Te digo che stago bem…vara me buto zò n’atimo… Po’ te derai che…
- No, no mi telefono ala asociaziom…con quel che se paga no i pol miga po’ farne magnar fora tut en medizine…
- Ma lassa star, te digo…
- Va va a butarte zo, che entant telefono… Ma dime ti, far corsi de ginastica per far star meio i veci e ’nveze i ghe dà el colp de grazia… No no se fa così… Ah, ma i me sente adès, ecome se i me sente… Con quel che costa sto corso po’… e som stada propri mi a ensister tra l’alter… No, no se fa così…
- Vara che stago meio…
- No, adès ti te te buti zò… che tra ’n po’ te misuro anca la pressióm… Ma dime ti…