Cossa se pòl fàr? – Di Cornelio Galas

Ale tante i ha fàt le nòve regole per el còvid. Quéle per le feste, ensóma. Pòdo dir quel che penso dopo avérle lète? Propri en grant casìm.
Entànt perché – pur restando dénter na specie de gàbia per tuta l'Italia – le càmbia en zérti posti: Alto Adige, Trentìm, Veneto per dir.
E po' perché co 'sta storia che tute le regióm 'taliane le deventa de colp giàle, ma rosse nele feste e nei dì prima dele feste, e arancioni nei altri dì fìm ala Befana (a parte l'Abruzo che 'l resta arancióm) bisogna davéra – prima de nar for de casa – lézer bèm quel che gh'è scrit sui giornai.
Ma meio – digo – farghe 'n colp ai vigili per domandarghe quel che se pòl fàr quel dì.
 
Eco, questo l'è quél che forsi i dovrìa méter en ciàro, sui giornai (non sol l’Adigeto.it, se sa) e néle televisiom: quel che se pòl far.
Ve fàgo n'esémpi, tra l'alter de sti di chì, prima dele regole nòve.
N'amica che, finì de laoràr a Riva, la và vers Malzésem dove la abita. Oscia, i la ferma a Navene: en quart d'ora dopo le dése de sera.
Quatrozento euri de multa. En po' de mén se la pàga entro en par de stimane. No gh'è zeròti che tegna: gh'è el cuèrta fòch [coprifuoco – NdT] i gà dit.
E gnent da far, gnanca a piànzer en cinés.
 
Per carità, no som chi che digo de no rispetar le regole.
Che sti Dcpm, ste ordinanze no le serve a gnent contro il virus. Anzi. Però no credo sia domandàr la luna se se pretende n'atimim de esser pù ciàri.
Cosa vòi dìr? Ancòi el Coriere dela Sera l'ha zercà de risponder a dele domande che 'n po' tuti ne fém (e ne farém) su sti divieti.
Eco quel che l'ha scrìt el giornal:
 
- Nei dì rossi se pòl nar a far la spesa?
Sì, i negozi alimentari, le farmacie, le parafarmacie, i tabachini ì è averti.
 
- Gh'è altre boteghe averte?
È serà le boteghe dei vestiti, quele dele scarpe, le gioielerie.
 
- Èle averte le lavanderie?
Sì, anche le tintorie.
 
- Se pòl nàr dal barbér?
Sì, i è daverti.
 
- Se pòl nar a farse le cerete e le ongie?
No, tut serà.
 
- Nei dì rossi, bar e ristoranti èi averti?
No, serài tut el dì.
 
- Nei dì arancioni bar e ristoranti èi averti?
No, tuti serài, tut el dì.
 
- Se pòl organizar feste?
No, tut vietà sia nei locali che a cà.
 
- Nei dì giàli bar e ristoranti èi averti?
Sì, ma sol fim ale sei de dopodisnar. Se pòl star entorno ala tàola al massimo en quatro, de pù se se vive ensèma.
 
E no l'è finìa...
 
- Quando èlo che tuta Italia la deventa zona rossa?
Dal 24 dizember al sei de zenér, nei dì de festa e nel dì prima dela festa.
 
- E arancióm?
Nei dì feriali, tra Nadàl e Capodàm, quindi 28, 29, 30 dizémber e quatro de zenèr
 
- Se pòl spostàrse nei dì rossi?
Sol per nar a laoràr, urgenze e problemi da farse veder da 'n dotor. Ma co l'autocertificazióm
 
- Se pòl nar a disnar da 'n parente e a zéna da n'alter?
No. Se pòl moverse sol na volta al dì e vers n'abitaziom en regiom.
 
- No se pol spostarse da 'n comum a n'alter el 25, 26 dizember e 'l prìm de l'am?
Tut vietà. A mem che no ghe sia urgenze de lavoro, dotori e altro che no se pòl farne a mém.
 
- Quel che abita 'n d'en comum pìcol pòdelo nar dai parenti nei comuni vizini?
Se pòl spostarse dai comuni con mem de zinquemìli abitanti el 28, 29, 30 dizember e 'l quatro de zenèr. Al massimo fasèndo trenta chilometri. No se pòl nar nel capoluogo (Trent, per noi) dela provinza. Un de Perzen nol pol nar a Zambana perché el deve pasàr dal comun de Trent.
 
Eco, no credo serva dìr alter.
Ah, me desmenteghévo, en Trentim, da ieri, el cuèrta fòch l'è dale dese de sera ale zinque de matina. Ocio...