Fà sì tant calt che... – Di Cornelio Galas

Odio da semper el càlt. Quel sentìrse tacaìf. Co le mosche che propri per quel sudòr tacaìf le te vèi a becàr. E po' la testa che te par che se brùsa el zervèl. E adès voi propri veder quei che te misura la féver per el covid quando vèi fòra che te gài... la testa che fa quaranta gradi. No me piàs ensoma sto calt. Che i dìs che 'l sia de pù de na volta. Che el vèi da l'africa. Che l'è colpa de quei che manda fum ne l'aria.
E 'n po' anca dele scoréze dele vache cramento.
 
Lézo che anca vizim al Polo Nord e a quel de soto i và en giro zamài co’ la canotiera. Che dove gh'è semper stà el giàz adès i ha més adiritura i ombreloni e i vende gelati.
E noi chi a arfiàr sperando che dopo el tóm sentì dale bande del Bondòm vegna zò almen do gozze.
Sol che de solit gh'è na pasàda. E dopo le pù calt de prima. O pèzo: vei na tompèsta che spàca su tut.
E 'l dì dopo te séi lì, soto 'l calt che pù calt no se pol, a tirar su tocheti de rami, fiori e vasi.
 
No basta, l'è ora de finiamola. Meio quando se bàgola dal frét. Che almém co 'n maióm te stai subit pù bem. Meio quando piove che così te spàrmi de brevàr l'ort.
Forsi no ve rendé cont de quant che l'è calt.
De come è cambià sto mondo. De come el sól el ne stà cosèndo piam piam come na luganega sula grilia.
Provo a spiegàrvel.
 
Fà sì calt che i tarzanèi sul bus del cul i mòre negài dal sudor.
Fa sì calt che – sol adès i l'ha capì quei dela Provincia – l'ors scampà dal Castelér el voléva sol nar dal barbér a farse taiàr el pel.
Fà si calt che el comum de Arco el fa le riuniom del consiglio on làin. E ogni do minuti i se desmentega chi gh'è e chi no gh'è.
E alora i deve far de nòf l'apelo. L'altro dì i è nài envanti cosìta fim ale quatro de matina. Quando féva pu fresch e i capìs che forsi l'era ora de nar a paiom.
 
Fà sì calt che qualchedum ha pers el cont dei soldi dela Provincia. Dozènto milioni che no se capìs dove i sia finìdi. Ma che tut mal da qualche banda i gh'è.
Fà si càlt che – l'ho vist coi me òci – um del centrodestra che voleva far el sindaco a Trent i l'ha trovà dale bande del Marinaio che 'l zavariéva.
El seitéva a dir: «Ma alora perché m'hai tirà en bàl a so temp?».
Fa sì calt che el Fugati l'ha dovù vegnir zo a pè dal Bastiom de Riva dove l'era nà su col trenim, co la sposa e i boci.
No l'aveva pagà el bigliét. E l'è per quel che no 'l savéva i orari.
Fa sì calt che le sardèle del Garda dal lach le se bùta drìte nele padèle co l'oio. Che l'è en modo per esser magnàe subit e de no tirarla per le longhe.
 
Oh, putèi, fa si calt che quando la matina i fa le previsiom del temp i ghe tàca semper «possibili rovesci». Pù per compassiom che per alter.
L'alter dì su la ciclabile de Dro ho encontrà do todeschi che néva en bici. Còti. Soto 'n sol che se te metévi n'òf sul cofano dela machina el deventéva séch prima ancora de tocar el fer.
«Salve – gò dit – che càlt però ah...»
I m'ha vardà en modo strano. E i ha tocà con 'n dè la testa. Come per darme del màt.
Ah zà che kalt en todèsch vol dir frét. Ma se sa, lori i è sèmper ala reversa.