Le sorprese de Pàscua – Di Cornelio Galas

Varda tì, déle volte, anca st'am Pascua la vèi de domenega.
Tut mal ne sém ciapài per temp. E ve savém dir quale che le sarà le sorprese, le maravée de la Pascua de st'am.
No quéle che se trova nei òvi, ma quéle che 'n zèrto modo le ne cambierà anca la maniera de viver.

Entànt – anca se no gh'è ancora el governo, ma se sa zamài come la narà a finir – la benzina, el gasolio e anca gas e luce e metàm, i costerà tant de mem.
En pratica con quel che prima te costéva empienir el serbatòi, oltra a 'mpienir en par de taniche, te vanzerà i soldi anca per nar a magnar na piza (co le bire e 'l cafè) per quatro. Ti, la to sposa e i do fioi.
Ma anca se te gài tre fioi no l'è che te dovrài tacargh'en tanti de pu neh.
 
Le tasse? Tuti quanti i pagherà sol el quindese per zento. E i te darà de volta i soldi che t'hai pagà en pù dal prim zenèr de st'am.
Semper se le tasse te le hai pagae, se sa.
 
No l'è finìa. Tuti quanti i poderà avérghe en casa almém na pistola. E anca dodese colpi. Tut agratis e senza firmar tante carte.
Per i colpi en pù – se a um no ghe ne bastés dodese – ghe sarà na detraziom dale tàsse del zinquanta per zento.
Na specie de asicuraziom che te paga anca i dani al plafóm se te dovés partir en colpo per sbai.
La lezitima difesa la parte da na domanda che um el dovrìa farghe prima al ladro vegnù en casa: «Sèt en ladro?»
Se que l'alter no 'l risponde subit se pol sbararghe.
E se pòl sbararghe anca se 'l risponde de no o de sì ma cole mam tegnue bem sora la testa.
 
N'altra roba che deventerà lègie propri a Pascua: quei che vei coi barconi da l'Africa.
Ghe sarà la Marina pronta coi canoni disente da Lampedusa en via. E soratut en zo.
Tuti pronti a sbarar se quei barconi no i narà de volta.
 
Po' ghe sarà almem mili euri per tuti quei che, carte ala mam, i farà capir che no i ha mai laorà, o che se i ha laorà l'è sèmper sta en nero o che de laoràr propri no i ghe n'ha vòia.
Tornerà a valer le vecie lire. Na lira la gavrà el valor de n'euro. Ma sol en Itaglia.
Zà dopo el Brenero na stéca de ciocolata se la pagherà desemili lire, zinque euri. Come adès del rest.
 
En Trentim el Rossi el farà en nof partito col Dellai per le elezióm de st'autum: el se ciamerà «Tirém inànz» (Tirol Italia per l'Alto Adige).
 
Spèta, spèta, spèta… ho vist sol adès che Pascua st'am la casca el prim de april.
Scuséme...