Dìme qualcós che no me bùta zó – Di Cornelio Galas

Tàco via co na barzeléta che forsi savré ma l'è sol per spaiàrme da quel che se scólta, se léze da 'n pèz e tuti i dì.
Alora: da na finestra de 'l palàz gh'è um che, dopo aver magnà e bevù de tut, 'l stà mal.
E ghe vèi da vomidàr. De soto, en stràa um el vede sta sporcaria che per pòch no la ghe vegnìva sula testa. E 'l dìs: «Chi èlo che bùta zó?» E quel sula finestra, dopo na scataràda: «Ah, sóm mi che bùta su».

No l'avè capìda? L'è istéss. Gnanca mì ultimamént capìsso qualcos de quel che suzéde co sto coronavirus.
Perché dala matina ala séra cambia le regole.
Ensóma l'è come se i dése comandamenti i deventéssa vìnti, po' trenta, po' quaranta.
E che i nòvi comandamenti i fùssa tut a l'icontràri dei primi dése, vìnti e via cosìta.
 
V'ho zà contà, la stimàna pasàda, la storia dei me suòceri.
Che no l'è finìda neh. Perché adès la suocera i l'ha portàda a casa co l'ambulanza.
Però guai se la dorme con so marì (me suocero), guai se i magna ensèma, guai se i varda la televisióm sul stéss divan.
Gh'è tante robe che no se pòl far. E tra l'altro fiòi, neói, zèndri... Fermi lì neh.
Se ghe porta la spesa, se la làssa davanti al portóm, e via come la polizia senza dìr gnànca bàf.
 
L'istessa grana, se non pèzo, per me fiòl, a Pisa, vist che la Toscana adès l'èi zona rossa.
Tut via compiuter, tamponi da far, e morósa che no la deve star lontana perché tra comuni no se pòl nar e vegnir.
Far el tampóm per saver de che mort se pòl morir?
No l'è – el ridigo – questióm de soldi (anca se oscia 82 euri a testa per sti esami, dai...) ma se vèi fòra che te gài el covid en teoria ma anca en pratica, te dovréssi star serà denter cà.
E alora chi elo che pòl portar da magnar ai suoceri?
L'è come el gàt che se morde la cóa.
Se te fai la roba giusta po' no te pòi far quela che deventerìa la roba sbagliada.
 
I dìs che se pòl far vegnir zent a casa per la spesa. Bòm. Telefono a sto numer.
E no l'è che sia semplize vegnirgh'en fòra soratut se – pàr – um dei do suoceri no l'ha fat gnancora el tampóm, cramento.
Alora ghe digo: «Féghe sto tampóm dela madòna no?»
Eh ma ghe vòl qualcos de scrìt dal medico de faméa.... che la mé dìs (sta dotorèssa) che bisognerìa prima spetàr el secónt tampóm dela suocera.
Che dopo se podrìa... Ensoma, damela tomela, 'sa fàga?
No se pòl nar denter en quela casa, no se pòl darghe na mam a far pulizie e altre robe.
E bisogna spetàr che ghe sia sti tamponi. Che no se sa quando e come i li farà.
Che po', me dis en medico, no l'è che fàt el tampóm finìs tuti i casini, neh?
 
El so, gh'è zent che stà pu mal. Basta vardar la televisióm.
El so, sém tuti sula istessa barca, messa mal.
Però oscia no l'è da algéri che sém en sta rogna.
Forsi se st'istà se penséva de tràrse envànti magari adès no sarém en sti pàssi.
Ah, ultima roba: me sa che bisogna a sto punt cambiar el detto: «Nadal a to cà, pasqua forse anca. Ma non con i tòi.»