Cornelio Galas, saóri/ 13 – La minestra de zanzarèle

>
  La minestra de zanzarele  
Ah quela che me feva me pora nona Maria… Voi, pisòti, no ghe la faré mai a farla sì bona.
Gnanca mi per quel.
Tut mal, entant ve spiego cosa che le è ste zanzarèle.
Le zanzarèle l’è en pratica dei tochi de pasta. Ma no li fa né la Barila né la De Ceco.
E po’ no l’è che sia propri pasta… Disente che l’è dei picoi giòmi gnanca un gualiv a l’altre che se forma misciando ovi, farina de mais e brodo de carne.
Le zanzarèle non le gh’è zà pronte, crue, da còser. E per quel che so no i le vende gnanca (almen che … boh).
Disente che le zanzarèle le se fa da so posta quando buté quel misciòt che v’ho dit nel brodo calt.
 
Alora vardénte demò quel che serve per far sta minestra per quatro:
-    Dozento grami de farina de mais (quela de le panòcie, no del forment)
-    Tre òvi (se dis òvi o óvi a seconda che sia de Trento o de Roveredo)
-    Brodo de carne (o de dado se volé far pù svelti o se no gavé la carne)
-    Formai gratà (meio el Trentingrana, anche se na volta no ’l gh’era)
-    Sal. Se sa.
 
Ades partin.
Anca stavolta bisogna laorar de man. Entant sbaté ben en de na padelota i òvi (senza i gùssi neh, sol ciàre e róssi).
Sbàter, sbàter ben… eco, butéghe zo pian pian la farina de mais. Ocio che no vegna fora i fregoloti. E dai che ghe la fé. Fe’ cont de darghe el mestol zo per le recie a quel che ve sta proprio sule bale… Vist che ne’ pu en pressa adès?
Bom. En cicin de sal. No massa. Quel che serve.
 
Entant en banda en de n’altra padela fè boìr el brodo. Col dado. O quel che avé dropà per far la carne a less (se volé anca zà pront el secónt).
Piam piam zò la pastela che avé fat e laoré col pirón en modo che vegna fora tante zanzarèle, capì come? No? Oscia, deve vegnir fora dei picoli giòmi de pasta, no na roba grossa o tante robe grosse.
Disènte che le zanzarèle le è come la pastina en brodo, capì adès?
Basta pochi minuti. Che no vegna fora en pastròc…
Dopo zò nei piati (quatro). Co na bela spolveradina sora de Trentingrana gratà zo.
 
’Sa ghe beverghe drio? 
Dirìa na sciavéta. Ma anca en merlotin. Dipende da quel vin che ve pias de pù.
La coca cola? Barèa.