Quel vecio canapè… – Di Cornelio Galas

L'ho vist. Cargà su 'n motocaro. Coi so ligàmi giusti. Che no 'l dondolés entant che 'l néva. L'era propri davanti al mùs de la me machina. Quanta pólver che 'l spandéva. Prima de nar a morir - el se la sentìva secondo mi - a la chìpa.  
E te vegnìva 'ndòs anca le robe vecie de quei cosìni, de quéle mòle zamai róte, de quei tòchi de legn soto tut.

L'avrè zamài vista, anca voi, la reclam de quel divano, co le vecie morose che te fa ciao... per ricordàrte, demò, che propri lì, t'hai spatuzzà altre dòne, prima de quéla che adès l'è vegnùa en quela cà.
Per la prima volta. Senza savér gnènt de quel che gh'è stà prima. Su quel vecio canapè.
Che po' no l'è sól questión de dòne. Lì te te sei butà zò, squasi butandote a pèi zonti, e restando lì, fin la matina, quando t'eri strach mort, dopo 'n dì che no paréva finir pù.
Lì te sei finì per 'ndromenzàrte dopo quei cine pieni de reclam.
Lì te te sei méss, co la féver e la cuertèla, ensognà, ma fin a 'n zèrto punto.
E lì - quando l'era massa calt de fora - t'hai scominzià a lézer 'n libro. Che ancora te gài da finir.
Quel vecio canapè el va vers el so destin.
Ah sì, el se ricorda de ti. Te sei tì, scusa neh, che no se ricorda de lù.
Suzède. Anca tra veci amizi. Suzéde. Anca tra òmeni e done. Anca se per ani s'è stài bèn enséma.