I le envènta propri tute – Di Cornelio Galas

Me ricordo quando gò fàt veder quel che se podeva veder en Internet a me pòr papà.
«Madònega – l'aveva dit – i le envènta propri tute a sto mondo.»
La stessa frase che aveva dit el pòr Bruno Càgol, quando su, a Spini de Gardol, era vegnù fòra l'Adige a colori e prima de quel dì quando i ne aveva ensegnà a far el giornale senza la machina da scriver, senza mandar le carte col fuorisaco.

E ancora, quando el Paris – gavévo domandà pù rolini per far le foto ala redaziom de Riva – el m'aveva dit: «Te dérai che tra poch no servirà gnanca pù la pelicola per far le foto e gnanca la camera oscura.»
Ensoma, la me generazióm (depù quele de prima) le ha passà ani de... miràcoi.
Con scoperte, envenzióm che no ne saréssem mai enmaginai. Per dir: co la «domotica» te vai dénter en casa e te ghe dìsi a una (ma chi èla? Chi vegnirìssela a esser?) de empizàr le luci, de tacar el forno, de méter su na canzom.
E quela (me par la se ciàma Alessia, ma no volerìa sbagliarme) oh, la fa tut, preciso preciso come te gài dit de far.
 
El prà del giardìm da taiàr? Basta empizàr el robot. Che el te fa anca i àngoi. E 'l te tira via l'erba anca dale fughe dele piastrèle, se propri te voi.
No parlénte de le machine. Che le è deventàde zamài dei compiuter.
Dal cruscòt davanti – basta parlarghe anca chi (semper na dòna tut mal te risponde) – te pòi farghe far i numeri de telefono che te vòi, dala suocera a l'amante (basta che no ghe sia anca la sposa en machina, se sa).
Po' la te sa dir, sta vóze, quant te manca per nar dove te vòi nar, quanta benzina t'è restà nel serbatoio e per quanti chilometri se te sèiti a nar schizando l'aceleratór.
Dove te devi svoltàr. Dove te pòi parchegiar. Dove se magna, dove se pòl crompar i zigaréti, dove gh'è n'albergo con camere libere e quant el costa.
 
Ensoma, no te sei pù nele condizióm de vardar la spia dela riserva e de tocàrte de soto sperando de no esser massa lontàm da dove i la vende.
E te basta parlar per savér subit quel che te vòi savér.
Subit. Che na volta, se te girevi co la carta geografica vecia de dese ani te risciévi de... trovarte de colp en den paés che no era gnanca segnà.
 
È finì anca quel strussiàr per ordinar le medizine. Basta na mèil (o en sms) al dotor e zachete, poch dopo te poi trovar la medizina en farmacia, senza far la cóa en ambulatori.
Anca col covid, fàte le do punture del vacino, me som trovà en messagio sul telefonim: te sèi a posto, schìza chi che te vèi fòr el grìn pass.
E cosita no i pol dirte pu gnente anca se te vai a l'estero... Bel no?
 
Sì, i le envènta propri tute, diàolpòrco. Però zèrte de ste robe nòve, no so, no le me convìnze propri tant.
Per esempi, l'altro dì, vedo sul compiuter la reclàm de 'n sistema per tegnir lontani i ladri dala casa.
Le so bele sirene («assordanti», i spiega), el colegamento coi carabinieri col telefono apena gh'è rumori strani.
E va bem anca questo. Po' però gh'è quéla roba che m'ha fat pensar.
En do parole: na nébia, na ghèba, che se qualchedum vei denter, la fa en modo che «Se non vedi non puoi rubare».
Oscia, me som dit. Fum dapertut. Sti ladri che ghe par de trovarse en Val Padana e no i sa pu a che casèl de l'autostrada nar fora.
E alora i pianta lì tut. E dove vai se no i sa gnanca dove gh'è la porta per scapar?
 
Ala fim, magari, quando finìs tut l'ambaradàm, te te i trovi spaventài nel to cèsso? Zerto, se tut va bem. Ma meti che enveze che i ladri te sei sta ti, dopo na zéna a base de teròldech, a nar denter to casa senza prima aver sblocà sta gheba...
Alora te finìsi tì co la testa nel water.
E magari la sposa, nele stesse condizióm, la tira anca l'aqua, cramento.
E pò la te dìs: «Che casìm, semper a mi me toca netar su en sta casa».
 
Secondo mi l'è altre robe che se dovrìa enventar.
Per esempi, la buto lì neh, na machina che la matina prest, quando te te levi dal let ancora endroménz, la te dà na mam... almén a enzolàrte le scarpe.