Cornelio Galas, saóri/ 15 – La crostata di ortiche

>
Le ortìghe? Scométo che ghe sté ala larga. Per no ciapàr la spìza. E 'nveze le ortige le fa bem. Domandéghe a quei che s'entende de erbe. E alora perchè no far na crostàda de ortighe?

Sùbit quel che serve se a magnàrle se è en sèi:
(per la pasta fròla):
- 250 grami de farina bianca
- n'eto de buro
- n'eto de zucher (sì, n'eto, zento grami, perché elo massa?)
- na bustina de vanilina (la trové, la trové ...)
- meza bustina de lievito per dolzi
- do òvi entréghi (cioè, no zà roti e tut, mal vol dir rosso e ciàra ensema)
(per el ripieno'nveze ...)
- do èti (anca en pel de mén) de fòie de ortìghe taiàde zo fine fine
- en cuciar de uveta
- en cuciar de nós taiàde fine fine come le ortighe
- mèz bicierin de sgnapa (ocio... el rest no sté beverlo entant che lavoré)
- en pel de canèla en pólver
- na sbrissiadina de sal
- mèz èto de amaréti sbrisolài
- mèz èto de pan gratà
- do èti de zucher (el so, no l'è en dòlz per quei che no pol...)
(e ancora ...)
- marmelada de quel che volé (no massa però)

No sarà na roba da far en pressa. Ghe se vol n'ora e tre quarti…
Entànt bisogna far la pasta fròla (el so tanto che naré a comprar quéla zà pronta e congelada ...)
Alora: fé en mucio de farina bianca a fontana (col bus en mèz, tipo vulcano).
Butèghe denter i ovi (no i gussi, come semper), zucher, vanilina e lievito.
En banda fé deventar mòl el buro (come? No ocor frizerlo... basta che no 'l sia pu dur, fé voi) e quando l'è pronto empastélo ensèma al rèst de prima.
Dové far nar come semper le manote. Perché la pasta no la vègna fora con fregolòti strani. Ensoma na pasta bela deve vegnir fora.
Finì co la pasta? Lasséla polsar.
Entant voi preparé el ripieno. Bisogna lavar e sugàr le ortighe (che magari gh’hà pissà sora en caign... o en gat... o en contadin).
Po' ste ortighe le taié su fine fine: butéle denter na scodelóna ensema a le nos (taiàde fine anca quéle), a l'uvéta, ala canèla, ai amaréti (sbrisolài), al zucher, la sgnapa, en pel de sàl e en par de cuciari de pan gratà. Misciè tut bem e lasè che el se màsera per almen zinquanta minuti.
Bom, adès ciapè el stàmp dele torte (no 'l gavé? Fével emprestàr e se no... dai che no 'l costa n'ira de Dio e po' el gavè per far altre torte no?). Metéghe sul font e 'n banda el buro e sul font anca en po' de farina. Pena pena.
Adès ciapé la pasta frola (che zamai l'ha polsà anca massa) e tiréla 'n sto stamp de le torte en modo che la vaga sóra el font e en banda per en spessór de almén en centimetro.
Sul font de la pasta frola (che la stà adès sora el font del stamp no?) metéghe la marmelada.
Sóra altri do cuciari de pan gratà. E zò anca el ripieno.
Po' sóra a tut sto pastròc scominzié a far dele strisie de pasta frola (quele che po' vedé che taia en qua e en là la crostada, se sa bem).
Eco, forsi m'ero desmentegà de tegnir via 'n po' de pasta frola per le strisie. Ma adès el savè. Se no dovè far altra pasta frola, che ve diga...
Ala fin dénter tut nel forno a 180 gradi per almén trenta minuti.
E po' via a magnar la crostada ale ortighe.

Cossa béverghe drio?
En bon vinèl che no sia dólz. Va ben anca en spumantin se propri. Ma brut.
Cioè séch no de quei che dopo te fa vegnir la nausea dal massa dólz.
E se no gavé el spumantin va ben anca en merlotin, dai.