L'ora de adès e quela de algéri – Di Cornelio Galas

Entant che scrivo ste righe l'è demò le sei de dopodisnàr de sabo vintiséi otober.
Ancòi, se dovésse lezer ste robe ala istessa ora sarìa envéze le zinque.
Perché – come savé e se no 'l savé sté tranquili che ve ne scorzeré prést – bisogna tirar endrìo i orolòi de n'ora.
Dai che zamài savé come la va a finir la storia: se dorme n'ora 'n pù, se magna (vèi fàm, se de solit magné a mezdì) n'ora prima.
 
Tirém innanz dopo aver tirà endrìo l'orolòi.
E vedré che ancòi la solfa l'è l'istessa dele altre volte: l'è le nove de matina ma sarìa le dése... l'è le oto de sera, ma sarìa zamai le nove.
'Sa fénte? Nénte o sténte? Magnénte o spetém che se sia l'ora giusta de na volta?
Nénte a dormir n'ora prima o fénte pù tardi per nar a dormir quando névem a dormir l'altro dì.
 
No càmbia gnent. Tra l'alter – se cosìta i doveva far per far sparmiar su la luce – me par che le boléte no le vaga tant en zó. Anzi.
E po', da quel che ho let sui giornai, i dis che l'Europa l'avrìa dit basta co sto nar envanti e endrìo de l'orolòi. Dal prossim am ogni stato el podrà far quel che 'l vol.
Ora giusta (a posto co la legie) o ora solare. Ognum per propri cont.
 
Oscia, no so perché, ma me sento che vegnirà for en bel casim.
Perché, méti: te vai en Austria e lì i gà ancora l'ora vecia, po' te passi en Francia e te torni a l'ora che te gavévi en Italia, po' te passi per la Svizera e te devi tornar a tirar endrìò l'oroloi.
No so voi ma a mi zà me gira la testa.
Per no parlar de quei che va co l'aeroplano: tante ore endrìo, tante ore envanti se i và en là o de là.
Ma no saréselo meio lassar star l'orolòi come l'era ani e ani endrìo?
Cioé: che quando el sol el tramonta l'àsem el s'empónta? Che quando el sol vei su... quela l'è l'ora de nar for dal let per tuti trane per quei che vol restar soto i linzòi?
 
Me ricordo quando, per la prima comunióm, i te regaleva el prim orolòi.
L'ora giusta? No l'era quela del telefonim e gnanca del compiuter: se vardéva l'orolòi del campanil dela ciesa.
E quela la restéva fim quando magari l'oroloi el perdeva qualche minut (no gh'era le lanciéte dei secondi... sol quei che stéva bem i aveva ciapà quel tipo de orolòi, magari anca col dì, el més e l'am registrai).
 
Adès envéze gh'è orolòi dapertut. E no sol ne le staziòm.
Sol che no se savrà pu quala ora sarà quela giusta endove te abiti.
A mi me par na monada. Ma se sa, penso ala vecia.
Tut mal 'sa ve diga? Se ancòi me va de magnar a mezdì (che sarìa l'una de dopodisnar) per no saver né lézer né scriver, mi meto su la peverada. E se ciàva quei che magna n'ora dopo...
… Oscia, scuséme, me sta telefonando el me amico Giani.

- Ciao Giani, 'sa gh'è?
- L'era sol per ricordarte che doman ale sète e meza dovréssem trovarne al bar dela Mèry per nar a pescar... te te ricordi neh...
- Sì ma sarìa le séi co la nòva ora...
- Cramento, no so se rièsso a nar for dal let n'ora prima, gò el turno de not en cartéra.
-Alora fèm ale òto... Che sarìa le sète no?
- Scolta Cornelio, ma àt bevù de massa? No capìsso gnènt...
- Lassa perder, fàme na telefonada ale séi e mèza che ne metém d'acordi. Bonanot.