No sarém pù (forsi) come prima – Di Cornelio Galas

Diséntelo: stavolta la tonàda l'avem ciapàda fissa. Tuti quanti.
E quando - se spera - tut sarà finì, no l'è che podrém, zàch e tàch, tornar al tran tran de prima.
Ghe sarà da patìr, de sicur da farse su le màneghe e – come i nòssi veci, dopo l'ultima guèra – rifar su quel che ha batù zò, no i bombardamenti, ma sto diàolpòrco de virus. Dapertùt.
 
De zerto – sì, l'avém capì, a nos dàm l'andazo – farém scorta de mascherine en casa. Anca se ghe ne sarìa tant bisogn adès.
L'alter dì, en farmacia, i me n'ha dàt dòe, squasi de scondóm, perché avevo prenotà do dì prima.
«Ma no stà farte veder valà, che se no par che ghe le dénte ai racomandài.»
 
N'altra roba che sperénte la cambierà: el modo de enformàr la zent. De parlar en televisiom. Anca de scriver sui giornai e su fesbuch per dir.
L'ho zà dit na volta: anca mi, sule prime, me paréva che far dele batùe el podéssa tirar su el morale.
Ho capì però che no l'è cosita che se ghe pòl envegnirgh'en fòra.
No sol così almém. Che po' fa bèm scherzar col fòch... basta star però lontani dala fiàma.
 
Eco, che ve dìga, me par che anca zerti politizi, zerti esperti - come dir? - i vàga spés for dal somenà.
Così come no soporto pù quei programi (registrài prima, va bém) dove se vede propri come èrem tuti enmuciài propri nei dì en dove en Cina vegnìva fòra 'sta tragedia.
No digo de star tuti enmusonài, zìti, dala matina ala sera. Ma gnanca nàr for da la bròca con reazióm che me ricorda tant quela de putelòti che canta per butàr via el terór del stròf.
 
Ho vist en funeràl, chi a Vignole, soto casa mia. El pàroco, zent che te contévi su metà mam, tuti lontani.
Na benedizióm e via, tuti a casa de corsa. Senza squasi vardarse nei oci.
Forsi no ne rendém conto, ma el coprifuoco el gh'è tut el dì, no sol quando el «Pipo» el moléva le bombe. E i mé noni i neva nel rifugio al Patòm.
Sto maledeto virus no te sài 'n dove che l'è. Magari t'el gài zà entorno e no t'el sài.
E ti te sei um dei tanti - come ghe ciàmei, asintomatici? - che lo porta en giro. Anca en faméa.
 
Tut mal son squasi sicur (mai dir mai) che finìda sta malediziòm dovrém oltre che tirarne su anca vardàrne bem denter. Zercando de capir – tuti quanti - dove avém sbaglià.
Ma soratut de volerne bèm pù de adés, che parém tante pégore (imunità de gregge?) che, vist el lupo, no le sa pù 'ndove scapàr.
E magari le se còpa, le se péstola, tute ciapàe, come par, de nar a crompar la mascherina, i guanti, da magnar perché forsi prima o dopo no gh'en sarà pù per tuti.