Quand che se néva ai freschi – Di Cornelio Galas

La freccia indica Cornelio Galas quando andava ai freschi in Colonia sul Monte Velo.
 
'Na volta, no parlo de l'altro dì neh, quando scominziéva i calóri en la Busa, ma soratùt quando no se savéva sistemàr i fiòi pìcoi (perché i noni i stéva poch bem, perché no gh'era soldi per nar al mare ensèma, perché... sònte mi perchè?) noi bòci se finìva semper... ai freschi.
«Perché - a Sant'Ana gh'era el pìco - féva calt, calt.» – Così i ne diséva.
Per farla corta, noi de Vignole, Bolignàm, Massòm e tut el rest (anca da Arco, anca i fioi dei siori de Arco) se finìva su ala Colonia de San Vincenzo, su 'n Vèl.
La stràa (de tèra batùa, quela fata ancora dai todéschi nela prima guera, restàda po' semper quela a parte 'l sfàlto) se la féva co na vecia coriera.
Tuti col so bel tascapàm con denter anca la banana (i pù fortunai) che zamai a Salve Regina (a metà) l'era nera come el babao e mola come na goma sbusada.
 
Vers i Ròchi, scominziéva i làresi e anca – se Dio voléva – n’aria mén calda dai finestrini averti.
Se paséva po’ la Capana de l’Alpim e po’, dopo mìli manovre ‘nvanti e ‘ndrio, la coriera la se ferméva nel piazà,l de la Colonia.
Dove gh’era ’l Berto, la Loredana, el maestro Miorelli, la maestra Saibanti pronti demò a farne le prime prediche su quel che se podéva ma soratùt su quel che no sepodéva far.
Tuti ’n bìna de dói, come a scòla, su per le scaléte che déva ’n le cameràe.
El temp de sistemar le nòsse stràze e subit zo ’n la cort a zugar a dàrsela, a scondiléver, a butàr figurine contro i muréti o a córrer de chì e de là senza gnanca savér dove, come e perché.
 
Vegnìva l’ora de disnàr. Co na lùzia che te féva netàr bem anca i piàti fondi.
Da bèver sol aqua. La ranciàta i la déva for sol de domenega, quando se ciapéva (sol quel dì, dopo Messa) anca ’n tòch de torta paradìs/inferno.
Che fresch che l’era, sóto quéle piante grande. Che bel star lì cola quertèla, anca dopo disnàr.
Po’ òppa, la maestra Saibanti la scominziéva a cantar: «Tre bei alpìn, andarono a la guera …». E tuti drìo sta dòna che no la stéva mai ferma, che la néva su come ’n stambéch fin ai Zanga e po’ su a Castìl e po’ zó dal’altra banda e po’ vers Santa Barbara e po’ vers Sant’Antòni.
 
Ah come se stéva lì a boca averta a béver, a bagnàrse co l’aqua che sponzéva la lengua da fresca che l’era, prima che en quel stéss posto vegnìs a far la stessa roba anca le vache del Giosuè.
E zo de nof ala Colonia. Zéna, el tèmp de far do corse per paràr zò la minestrìna, do péi de salata, na ciopèta arènt al salàm còt quando no gh’era i probusti boìdi.
E po’, senza spetàr Carosèlo, che no gh’era gnanca la televisióm, qualche repetàda che féva vegnir la ridaròla, qualchedun che ciaméva la mama… E l’era subir l’ora de alzar de nof la bandéra ‘n la cort.
 
Se vegnìva de volta el dì de Sant’Ana, quel de la féra de Arco.
Dove i vendéva anca i porzelìni d’India. E te paréva, ’na volta arivà demò ai Gazzi, de nar de colp dal Paradìs a l’inferno. Senza passar per el Purgatori.
Noia Vignole alòra ne trévem nel Salòm, anca se per bagnarse gh’era na pipiarèla de aqua. Semper mèio del Celestino che l’era finì nela vasca del verderàm e l’era tornà a cà dai sòi d’en color da spaventar mèz paes.
I aveva ciamà subit el dotor, el Colini. Che come so sòlit l’era bravo a no far veder le robe pù brute de quel che zà le era: «Tranquili, che ’ntant sto bocéta chi per almén dese ani no ’l ciàpa la peronospera…»